Minsan Kaidto sa Kalye Lourdes

Dai ko nanggad nalilingawan an sakuyang buhay sa Kalye Lourdes, sarong sadit na kalye sa Pasay City na iyo an sakuyang inot na pig istaran sa Manila. Duman ko na experiencia an ejemplo nin buhay sa Manila na pinag halo an marangya asin pobreng pagbuhay. An Lourdes Street, masusumpungan sa katahawaan kan F.B Harrison asin ini minabagtas sa Roxas Blvd anas sakop kan Ciudad nin Pasay. Taon 1976, premiro kong pagtungtong sa Manila lunad sa PNR abot sa Paco Station, nakidagos ako sa harong ni Tiyo Dikoy Parma, half brother kan sakuyang Ama. Magayon an saindang harong arog man kan saindang mga kataraid na poros familya nin mga may kaya sa buhay, alagad sa mga eskinita kaini yaon an mga squatters na hale sa man iba ibang provincia. An mga lumang harong kadaklan naka desinyo nin sa Kastila na iyo an pig istaran kan mga mayaman duman sa Pasay. Saro sa nagtao sakuya nin kaogmahan sa pag istar ko sa Kalye Lourdes iyo an kaugalian kan mga tawo na sa amay na pagka aga, nagpapa siring sinda sa Dewey Boulevard tanganing mag abang sa mga parasisira na naglalawod sa Manila Bay asin may dakop nin mga freskong sira. Mayong pinag iba an gawi gawi kan mga tao sa Lourdes sa buhay sa pantalan kan Sabang Calabanga asin sa Castillo Cabusao na sagana sa freskong sira ta sinda haranihon sa Manila Bay. Sa luwasan kan Kalye Lourdes, mahihiling an mga magagayon na Night Club, saro duman iyo an Rumulos na pig tutuyo kan mga Artista sa Pelikula, mantang sa balyo kaini iyo an F.B. Harrison na yaon an mga kakanan asin mga tindahan nin mga Chinese mala ta duman ako nakanood mag inom nin Soft Drink na Sarsi na an partner iyo an Chinese Hopia. Tunay na maogma an buhay nin sarong arog kong probinsiyano na naninibago sa Manila. Dai ko nanggad malingawan an gayon kan Dewey Boulevard lalo na sa pagka Bangui asin amay na pagka aga ta haros nagkakarera an mga yellow taxi asin mga lunadan nin mga mayayaman na tawo. Dai pa kaidto pig tatambakan nin daga an gilid kan boulevard kaya pig kakarigos kan tapwak nin alon an mga nag aaging mga awto sa boulevard. Magayon maglakaw laka sa Dewey, mapresko mag tukaw tukaw sa gilid ta dai pa uso ang mga adik asin shabu. Haranihon samuya an Cultural Center of the Philippines, kaya kun mayo akong gibo, ako naglalakaw lakaw pasiring sa CCP asin duman ako sa itaas solo-solong nagtutukaw tanganing masdan an magayon na fountain. Bako pang matawo an CCP kun kaya naging ugali ko ang duman magtukaw asin magpahingalo. Pero dai nag haloy, nahihiling ko an kadakol na truck na may kargang mga gapo nag aagi sa may Cultural Center kaya palan tanganing iwawa’ an mga gapo sa kadagagan kan Manila Bay para sa reclamation project, mala ta duman ikinaag inot an PICC. Dai gabos na buhay sa Manila poros kaogmahan. Sarong amay na pagka aga, nagimata ako na nagriribok si Tiyo Dikoy kaya palan ta an harong na samuyang pig iistaran pig agihan nin mga parahabon asin pig sungkit an mga sinablay na yaon sa laog kan kuarto. Duman ko naaraman na haros aro-aldao ang harabonan sa mga magagayon na harong sa Kalye Lourdes asin an pig sasahutan iyo man sana an mga squatter na nag iirok sa lugar. An maraot ka kaini ta an pinaka mayor na bantog na parahabon sa Lourdes iyo an sarong may pangaran na iking na sarong bikolano. Si iking nagluwas sa Manila ta habong magtrabaho sa sadiring omahan kan saiyang magurang sa pagtubod na masiram an buhay sa Manila. Dara kan pagtios ni iking, ultimong an harong kan kapwa niya bikolano dai pig palibre asin mga gubing hinakot para ibenta sa iba, dai pa kaya uso kaidto an ukay ukay. Nag abot an panahon na sa pagbutwa kan mga darakulang building sa Pasay, naging masakit an supply nin tubig. Haros kulang an sakuyang turog ta aro-aldao kada matanga , makikipila ako sa gripo para lang magsakdo nin tubig. Duman ko nagiromdoman an sakuyang matuninong na buhay sa Naga, na sagana sa tubig asin dai kaipuhan magpuyat an mga para sakdo. Dai naghaloy an mga darakulang harong sa Lourdes kasabay an mga squatter pinag dedemolish tanganing ikaag an darakulang edificio. Iyo na idto an punto na nagbalik na ako sa Naga ta mismong an harong ni tiyo Dikoy kaipuhan nang gabaon para sa mga bagong Mall sa Pasay. Mayo na akong dapat balikan sa magayaaon na Kalye Lourdes duman sa Pasay ta an gabos ibang-iba na, mayo na an mga squatter, mayo na an mga harong nin Kasila, imbes ini saro nang lugar nin mga haralangkaw na Hotel harani sa Roxas Boulevard. Siguro gabos na bikolano, dai nanggad makakalingaw sa inot na lugar na saiyang pig istaran kan premiro siyang magduman sa Manila.