Minsan Langkag

Igua kita nin kinatudan na gawe o siguro puede nang magpasar bilang kultura, kadaklan- bako man gabos, mahilig kita magtiripon pag madali na ang deadline o last day nin rehistro. Nadumog ang tao asin nagkakaigwa nin halabang pila ang aldaw bago ang huri asin pinakahuring aldaw.

Last day of filing na? Huring aldaw nan in pag-rehistro? Duman kita! Maamay man ngaya para amay man ang tapos. Parareho ang dalagan kan isip, pag abot sa lugar iyo nang laba kan pila.

Digdi nalaog ang kalangkagan, ang uyam na dara nin paghalat. Ang pagmate pag nasusuya ka sa bagal kan oras sa pila, nagiging irritable. Garo bulkan na nagtuga ang pagmate pag nakahiling nin nagsisiringit. Nasagom sa pagkatao ang pagmate nin inhustisya kan kinaban. Ang isipon na nagdadalagan sa mainit na alimantak- bako talagang patas ang dalagan kan buhay digdi sa daga.

Tanda nindo itong aldaw kan kita hinahatod asin sinusundo kan kita nagkaklaseng elementary hanggang grade 1 o grade 2? Bako man gabos naka-eksperiensiya kaini. May sarong hapon kadto, alas sais pasado na ako sinundo kadto. Saro saro ko nahihiling si mga estudiante paluwas sa campus kaibahan kan saindang sundo.

Magabat sa pagmate, habang naghahalat garo nagpaparabagal ang oras, haluyon na ang lampas sarong oras na haralatan sa pananaw kan sarong aki. Itong hadit asin pagkahagas na baad mayo nang magsundo hanggang mag-aga, na baad nalingawan ako, na baad magsara na ang eskwelahan na dai pa ako tatao mag-uli solo kadto. May halong kasuyaan sa pagmate ta mapagal baga magparahalat, Iyo to ang malinaw na halimbawa nin kalangkagan.

Tatao ka maghalat? Pano baya ang tamang paghalat? Ano man na mga paagi ang puedeng sabihon na marhay ang paghalat? Bihira lang ang mga taong gamay ang sistema kaini. Hilinga ang mga tao sa bangko minsan habang kapot kapot ang saindang numero sa sarong pidaso na papel. Maski high tech na ang proceso, mayo man high tech na paghalat, parehong oras ang maagi o malipas, dai man ngani naparikas ta minsan saro saro lang ang teller na naka-toka. Sa edad na ini, ang langkag yaon sa taong dai tatao maghalat.

Aram kan satong mga paraoma asin parasira ang pagmate kan kalangkagan ta ang mga pananom dai man nagbubunga insigida asin ang mga sira dai man tulos nagsusubad sa banwit o nagdudulok sa lambat para madakop tulos kan namalakayang parasira.

Kung igua man mga taong nalampasan na ang pagmateng dara kan kalangkagan, ang mga tao sa sektor nin pag-oma asin pag-sira ang mas may kapasidad. Nalalangkag man giraray alagad halawig ang saindang pasencia.

Igua ako nin klase nin kalangkagan ma gusto kong tungkosan. Malangkag dapat kita sa satong hineheroan na sistema, na magbago nanggad asin maging tultol ang padalagan. Mauyam dapat kita sa mga padara kan salang gawe na haloy ta nang hinihiling na normal na sanang bagay. Kung igua man mga bagay na dapat kalangkagan, iyo ang pagparadalan ta sana sa bagay na nangyayari na mayo kitang ginigibo. Kung igua man mga bagay na dai dapat ginigibo iyo ang pagiging parte kan helang na yaon nang haloy nang panahon.

Mayong madaog sa nanok na turog kada bangui. Harayo sa kapurisawan asin kahaditan na dara kan mga bagay na dapat kinakalangkagan na maray.