MNWD, LGU ma-inspeksyon sa mga booster pumps

Ni Paulo DS. Papa

TANGANING matuldukan an sala asin illegal installment kan booster pumps sa mga residensyas asin establisamentos komersyales sa syudad nin Naga pigkrear kan lokal na gobyerno asin kan Metro Naga Water District (MNWD) an Naga City Bantay Water Booster Pump Task Force.

Ini an nagin anunsyo ni MNWD spokesman Choppy Dela Cruz kan sigatuhon saiya an mapadapit sa kamugtakan kan supply nin tubig pakalihis kan panrarapado kan Bagyong Pepito.

Segun ki Dela Cruz, an task force pigbilog sa lindong kan Orden Ehekutibo numerado 2024-023, pirmado ni Alkalde Nelson Legacion kan Nobyembre 4, tanganing tawan tingo an polisiya kan gobyerno lokal asin kan water district sa pag instular nin booster pumps.

Pigsabi pa ni Dela Cruz, an tamang pag instular nin booster pump dapat nakatakod ini sa cistern tank na iyo man an maninigong naka konekta direktamente sa water distribution lines kan MNWD.

30 dias makalihis an Nobyembre 4, popoonan na kan water district asin lokal na gobyerno an inspection sa mga  establisamentos asin residensyas na may booster pumps.

Enkaso na manutaran an sarala asin illegal installation kan ekipahe, pagmumultahon an homeowner nin P5,000 sa first offence, P10,000 sa second offence asin kaso sa third offence.

Sa lado kan business establishment: Papamultahon nin P10,000 sa first offence, P20,000 sa second offence asin kaso sa third offence.

Labi sa sarong semana na sana an natatada para sa mga may sadiri nin residensya asin manihamentos kan establisamentos de negosyo sa syudad tanganing mag deactivate asin magpakarhay kan saindang installment kan booster pumps.

An nasambit na task force iyo an enkargado sa pag inspeksyon kan mga harong asin business establishments na may booster pumps - popoonan sa Disyembre 5, ngonian na taon.

Dugang pa ni Dela Cruz, salang pag instular nin booster pumps nagkakawsar man nin pagluya kan bulos nin tubig partikular sa mga residensya asin establisamento na mayo man kan siring na ekipahe.

Alagad piglinaw ni Dela Cruz na dae man pigpapangalad an pag bugtak nin booster pumps na nakadirekta sa cistern tanks, bagay na pigrerekomendar haloy na kan MNWD.