top of page

MNWD nag-aandam nasa operasyon kan STF

Pig-aandaman na kan Metropolitan Naga Water District (MNWD) an operasyon kan Septage Treatment Facility (STF) ngunian na taon alagad nagkakaigwa muna nin mga testing sa ekipahes antes isubasta an operasyon kan planta.


Alagad nagkakaigwa sinda nin dry run sa pagsipsip kan mga ati kan puso negro sa nagkaperang darakulang pribadong edificio asin escuelahan nganing i-ula sa bagong planta.


Ini an mga pahayag ni General Manager Engr. Virgilio Launsing matapos kan ginibong thanksgiving mass and blessing sa saindang bagong mga facilidades kabale na an septage treatment facility sa Sitio Caromatig, barangay Carolina, Ciudad nin Naga.


An STF mga quince kilometros an distansya sa centro kan ciudad iyo an uulaan kan mga pigsipsip na ati hale sa puso negro kan mga residencia maging establisimiento de negosyo, mga edificio kan gobierno na igwang water supply.


An gabos na residencia kan ciudad dapat igwang sadiring puso negro.


An water district kan ciudad iyo sana an kabale sa anom sa 115 ciudades sa Filipinas na igwang sewerage systems.


Sinabi pa kan MNWD an saindang septage management system program bako lang para sa benipisyo kan ribo-ribong consumedores envez sa kapalibotan.


An planta pigplano kan Noviembre 2014 kan mga nakaaging administrasyon kan MNWD.


Kabale sa bagong proyecto na pigbasbasan iyo an Monte Cielo asin Cararayan 4 pumping stations asin bagong MNWD Laboratory and Comcen offices. Katuyohan kan dugang na facilidades nganing maging de calidad an saindang serbisyo sa consumedores sa Ciudad nin Naga asin pagtaraig na municipalidades. (DPAureus)


bottom of page