MNWD naghahanap na nin bagong GM
An paghanap nin bagong general manager kan Metropolitan Naga Water District (MNWD) iyo na an pig-aandaman kan Board of Directors matapos dai na uyonan kan jusgado an hinahagad na preliminary injunction ni dating General Manager Virgilio Launsing asin huli kaini epektibo na an Board Resolution No. 15 na tinatanggal siya sa posisyon huli sa ‘‘loss of trust and confidence’’.
Si Engr. Emeterio ‘‘Boy’’ Aman, director kan MNWD nagpahayag sa Bicol Mail an desisyon kan Regional Trial Court Branch 23 sa Ciudad nin Naga binaba kan Abril 7, 2022 mientras na nagpaso na si 20 diyas na temporary restraining order (TRO) na pig-isyu kan jusgado pabor ki Launsing contra sa junta.
Alagad si caso sa reclamo sa kawaran ‘‘due process’’ sa pagtanggal sa dating GM iyo an nagpapadagos pa sa corte.
Sinabi pa ni Aman, sainda ngona pigdesignar si Assistant Finance General Manager Emma Cuyo komo Officer-in-Charge kan MNWD epektibo matapos kan desisyon kan corte.
An resolusyon numerado 15 kan junta contra ki Launsing kan Marso 15, 2022 kabali sa mga reclamo sa dating GM iyo an isyu sa transaksyon sa pagbakal nin cantidad P28 milyon na lote sa Sitio Pagdahicon, Barangay Mabulo asin P53 milyon na lote sa Barangay Balatas alagad an iimplementar na proyekto sa sinambit na mga lote mayo paman magkakanigong milyones peso na fondo.
Alagad an reaksyon ni Launsing dai marerealisar an pagbakal nin mga lote kun mayong board resolution asin aprubado kan finance department.
An kaparejong pigcucuestion na mga lote na-aprubaran kan panahon ni dating Board Chairman George Palma asin iba pang mga directors na sinda, Marilisa Ampoan, Monica Lily Claveria, asin Agileo Michael Pauig, sabi pa.
Nangyari an pagbakal nin lote sa Sitio Pagdahicon nganing gamiton para sa Bicol River Water Surface Treatment Plant Project asin an lote sa Barangay Balatas para sa expansion office kan MNWD alagad parejong mayong nakatagamang fondo an water district.
Hagad kan junta an cooperasyon kan mga opisyales asin empleados kasunod kan aksyon ninda sa dating GM dapat magtarabangan nganing mas mapakarhay an manijamiento asin serbisyo sa consumedores. (dpa)