Modernisasyon kan PNR Bicol masikad sa 2022
Dai man napunan tolos an patrabajo sa modernisasyon kan Philippine National Railwas (PNR) Bicol alagad naseseguro na masikad na an proyekto sa ika-duwang cuarto kan masunod na taon.
Prueba kaini kan 2018, an Department of Transportation (DOTr) nagpirma na sa kontrata para sa Project Management Consultant kan PNR Bicol asin sa detalyadong desinyo kan patrabajo sibil, afuera pa kaini an ahencia asin PNR nakatalaan nang ipublicar ngunian na Mayo 2021 nganing i-award an ‘‘civil works contract package 1 sa ika-tolong cuarto ngunian na taon.
Sinabi ni Greg Manio, Division Manager kan PNR Camarines Sur na enot nang pigpunan an survey maging aerial survey sa mga babagohon na relis kan perrokaril asin station.
Kabale sa pig-aasikaso iyo Environment Compliance Certificate na dapat aprubado kan DENR.
Saro sa aatubangon na problema kan China Railway Engineering iyo an road right of way maging an ribo-ribong squatters na dapat mapahale na kan gobierno.
Nagtutubod siya na antes matapos an termino ni Presidente Rodrigo Duterte sa 2022 puponan na an rehabilitasyon.
An manijamiento kan PNR sa pamamayo General Manager Junn Magno nagtutubod man na dawa sa masunod na administrasyon magpapadagos an proyekto.
Kan magbisita si DOTr Secretary Arthur Tugade sa Bicol International Airport (BIA) sa Daraga, Albay sa saiyang project briefing pig-anunciar an dakulang proyekto sa modernisasyon kan perrokaril.
An administrasyon ni Duterte nakaa-utang nin P175-bilyon sa nasyon kan China nganing i-fundo sa modernisasyon kan Bicol Express.
Alagad an cantidad na inutang babayadan kan gobierno Filipinas sa laog nin vienteng taon asin dos por cientong interest per anum.
An PNR Bicol railway line madalagan hale sa Sucat, Parañaque sa Metro Manila sundo sa Matnog, Sorsogon, asin hale sa Calamba sagcod sa Batangas oras na maging operational, abot sa 560-kilometros an laba kan relis asin piglalaom ma mabawas an oras kan viaje sa pag-ultanan Manila asin Ciudad nin Legazpi nin 14 hasta sa 18 oras asin magiging anom na oras para sa mga regular na commuter train asin 4.5 oras sa express trains. (dpa)