Modernization program planong iimplementar kan LTFRB

Naghahandal naman an mga operator asin tsuper nin jeepney kasunod kan nagluwas na impormasyon na plano kan Land Transportation Franchising and Regulatory Board (LTFRB) iimplementar an phase out kan mga loma nang pampasajerong jeepney sa maabot na bulan nin Abril 2022 mantang dai kakayahon kan halangkaw na presyo kan modernized jeepney nagcacantidad nin on milyon hasta sa dos milyones pesos.


Taon pang 2018 an memorandum circular kan LTFRB para sa modernization program kan gobierno asin kabale digdi si mga loma o 15 anyos nang jeepneys, buses, asin public utility vans alagad dai pa enterong na susunod kan mga operator sa tahaw kan mga ginigibong protesta kan sektor nin transporte laban sa plano kan gobierno.


Sa Ciudad nin Naga, an Pistton Development and Multipurpose Transport Cooperative nahahadit kun dagos nang iimplementar kan ahencia mantang ciertong apektado an saindang tolong PUV.


Si Domingo Forlaje, general manager kan Pistton nagpahayag na mayo sindang kakayahan nganing makabakal nin dakulang pampasajerong PUV.


Dawa pa ibayad ninda an mga boundary aroaldaw kan mga tsuper kan trimobile sa paagi nin hulogan sa bangko alagad dai pa ninda kaya mantang an koleksyon ninda nadalagan pa an iba sa operational expenses.


Kadakle kan saindang pigkakayod mga trimobile mantang tolong unit sana nin jeepney an nagdadalagan sa ruta kan loop service sa Magsaysay-Diversion-Centro.


Sa ngunian na pandemya apektado pa ngani an pagkayod kan saindang mga trimobile huli ta padagos sindang nalulugi huli ta limitado an pagluwas kan mga tawo kasunod kan pig-iimplementar na mga restrictions asin pulisiya na pigmamando kan national IATF.


Alagad tatawan pa sinda nin problema sa phase out kan PUV mapipiritan sindang igilid na muna an jeepney kun dai matao nin konsiderasyon an gobierno.


Sa pag-aadal kan Crispin Beltran Research Center an mawawarang mga loma nang sasakyan maabot sa 270,000 mantang riribayan nin electric jeeps asin Euro 4.


Kan nakaaging taon naulang an full implementation kan modernisasyon kan jeepney mantang nagpaluwas nin kasugoan an Transport Committee sa senado na dai muna iimplementar an PUV phase out.