Modular pabor sa ‘‘fast learners’’ na estudiantes

An Department of Education (DepEd) nagpahayag na nasa ika-apat nang bulan hinahanap kan mga estudiantes an face-to-face classes alagad si pigtalaan na dry run kaini kan Enero 11-12, 2021 dai dinagos huli kan pagbutwa kan bagong variant kan Covid-19 sa United Kingdom.


Sa saindang pag-aadal si mga estudiantes na nasa inaapod na ‘‘fast learners’’ iyo an nakakanuod asin igwa man nasasakitan alagad inaalalayan kan saindang mga paratukdo asin locally funded teachers.


Ini an mga pahayag ni Director Gilbert Sadsad kan DepEd Bicol mantang namamagohan kan blended learning an mga estudiantes kun ikukumpara sa dating face-to-face classes na dai pa tinutugotan kan saindang ahencia nin huli kan pandemya alagad luway-luway na kutang mabuelta sa mga classroom biglang kinancelar ni Presidente Rodrigo Duterte kan magbutwa an UK variant kan Covid-19.


Sinabi pa ni Sadsad na dakulang tabang an locally funded teachers mantang saindang inaako na bako talaga gabos marhay an ‘‘reception’’ alagad igwang estudiantes na nakakanuod sa modular o maging sa online classes.


Dakulang tabang digdi an mga magurang na maninigo sainda an saindang bilog na suporta lalong-lalo na sa pag-adal sa laog kan harong, sabi pa kan DepEd Bicol.


Nahahadit an ibang mga opisyal kan Parent Teachers Association (PTA) na kun magpaparahaloy an presenting kamugtakan na pinapasunod kan DepEd posibleng magparababa an calidad sa edukasyon.


Sa reaksyon kan pamayo kan DepEd Bicol sinabi kaini, nagtutubod siya na dai man ini mangyayari mantang sa mga masunod na taon magiging ‘‘blended’’ na an learning modality dawa na mawara na an pandemya.


Sinabi pa na natuod na sinda sa ‘‘feature generation’’ na kaipuhan na an suporta sa online asin iba pang modality sa pag-aadal.


Igwang mga unibersidad na kadakle online na o modular an ginagamit, an nangyayari sa ngunian na pandemya preparasyon ta ini kan DepEd asin magurang sa maabot na mga panahon na luway-luway nang nawawara an problema kan paratukdo arog kan kakulangan classrooms, sabi pa ni Sadsad.


Dawa mayong mga estudiantes sa classrooms alagad igwa man giraray nin hiring nin personnel asin paratukdo mala ngani kan 2020 igwa sindang 749 bagong item. (DPAureus)