Mongoso, naglalaom sa dugang na mga plano ni Lutey sa MNWD

Naglalaom an Metropolitan Naga Water District (MNWD) na makakatabang sa programa asin solusyon sa suplay nin tubig si Atty. Noreen San Luis-Lutey, matapos tukahan ni Alcalde Leni Robredo na magin katuwang kan manihamiento sa solusyon sa kakulangan suplay tubig sa ciudad asin pagtaraid na mga banwaan.

Ini an mga pahayag ni General Manager Florencio Mongoso Jr. dawa na ngani igua na sindang mga ginigibong lakdang sa kakulangan sa suplay nin tubig.

Sa manihamiento kan general manager nagpatukdok nin dugang na mga pumping station mala ngani igua nang 30 gabos sa ciudad asin pagtaraid na mga banwaan.

Alagad an haloy nang problema sa kakulangan suplay nin tubig sa Camaligan, Camarines Sur kabale sa dapat tawan prayoridad kan manihamiento.

Ngunian na burukasan nin klase dakul an magaramit na consumedores asin sainda na ining pig-andaman.

Piglansar na kan MNWD an kampanya contra sa mga naggagamit nin ilegal na booster pump sa Ciudad nin Naga asin pagtaraid na banwaan nganing mamantenir an suplay nin tubig sa nasasakupan na mga banwaan kan Gainza, Camaligan, Magarao, asin Canaman

Saro sa programa kan MNWD nakatalaan mag-conducir nin regular na inspeksyon an saindang task force sa mga residencia asin establimiento nganing mahanap an envuelto sa ilegal na actividad.

Si Lutey, afuera kan pagtabang sa programa sa suplay nin tubig, tinukahan pa sa problema sa trafico. Siya dating opisyal kan Land Transportation Office sa rehiyon Bicol asin National Capital Region asin sa presente Bise Presidente kan NLEX Traffic Enforcement. Naglalaom an Public Safety Office kan City Hall na makakatabang sa haloy nang problema sa trafico sa ciudad.

Dawa na ngani igua man nin mga programa an water district alagad kaipuhan an mas hararum kaining kaaraman sa pagpaplano asin coordinasyon.