Mongoso, ‘renewable’ sa puesto bilang AGM kan MNWD

Palawigon man nin sagcod sa sarong taon an pagtukaw ni Florencio Mongoso Jr. bilang acting general manager kan Metropolitan Naga Water District (MNWD), nagtugot sana siya cada tolong bulan alagad ‘‘renewable’’.

Mapaso na an anom na bulan na ‘‘term of office’’ ni Mongoso sa Deciembre 31, 2022 mantang naheling an saiyang marhay na performance bilang AGM, huli kaini pigrecomendar siya ni Alcalde Nelson Legacion na puede pang maglawig sa MNWD an nagtutukaw na AGM na pinaboran kan junta directiva.

Alagad sa entrevista kan Bicol Mail ki Mongoso sinabi kaini tama na an cada tolong bulan na ‘‘renewable’’ asin kun maheling na marhay na an dalagan kan water district sagcod nakahawas na sa pagkalugi puedeng magbalik na siya sa City Hall.

Siya pig-nombrahan kan board of directors kan MNWD bilang AGM matapos patalsikon sa posisyon si Engr. Virgilio Launsing bilang general manager huli kan isyu sa ‘‘over price’’ sa barakalan nin lote asin milyones pesos nang nalulugi an manijamiento.

Si Mongoso, iyo an jefe kan Metro PESO kan City Hall asin pinasuble sana siya ni Alcalde Legacion nganing makatabang na maresolberan an problema kan water district na ngunian luway-luway nang nakakabangon.

An manijamiento kan acting general manager suportado kan miembros kan junta directiva asin mga empleados. (dpa)