Motorally sa Partido area marangkada liwat
Ni Sonny Malate
Marangkada na an Motorally de San Jose V2 sa Mayo 10-11, 2024. An maogma asiñ bibong event na pig-initiar kan local na gobyerno kan San Jose Partido nasa ika-duwang taon na. Apwera sa banwaan na ini mismo, an ruta kan motorally iyo an nagkakapirang banwaan sa Partido Area.
An fun motor ride event sarong kaisipan ni Alkalde Jerold B. Peña na saro man na motor rider. Katabang niya sa actividad iyo an manlaenlaen na mga suportadores gikan sa gobyerno asin pribadong sector.
An dakulang event paparticiparan kan labing 800 na fun motor riders na naghahale sa man-iba-ibang parte kan nacion. Tampok na celebrity guest iyo an motovlogger na si Jet Lee, Philippine Motorcycle Tourism Ambassadress. Si Cezar V. Villanueva kan Tourism Promotions Board Philippines piglalaoman man na magigin presente. Maabot pa man si Sen. JV Ejercito asin team niya.
An magayon na daragang motovlogger dakolon na followers sa social media. Linalaoman na dakula ining hatak sa participantes sa event. Siring man, sa mga followers niya sa Bicol na pig-aanticiparan na madagsa sa ruta kan motorally.
An motorally pinagmarhay na gibohon ni Alkalde Peña sa pagmawot na maitampok an magagayon na lugar sa San Jose Partido asin pagtaraid na lugar, orug na sa social media asin ibang plaftorms. Ini maresulta sa dakulang hatak sa turismo kan localidad.
An magayon asin famosong motovlogger na si Ms. Jet Lee, tampok sa Motorally de San Jose V2. (Photo: LGU San Jose Partido)
Nagkakapira sa mga pambihirang lugar na aaboton kan participantes iyo an Partido Riviera sa Barangay Patitinan, Sagñay, Consocep SMDP Resort & Water Falls, Tigaon,
Kabale pa iyo an Tierras Altas Cafe, barangay Genorangan, Lagonoy, Rizal Park sa Siruma asin sa heritage area kan San Jose Partido kun saen namumugtak an mga ancestral houses sa banwaan na ini.
An grupo kan mga motorista mapalihis kan banggi sa Mayo 10 sa may Talisay Port, barangay Dolo, sa vicinidad kan Partido Boulevard na iyo an starting point kan motorally.
Si Alkalde Peña may piglinyadang bibong programa sa Solidarity Night na matampok nin magagayon na musica sa paagi kan mga local na musikero. Maserbi man nin managom na mga local na kakanon asin iba pang kaogmahan para sa kaalingaan kan mga participantes.
An motorally saro sana sa actividades na piggibo sa San Jose Partido tanganing maparambong an turismo, cultura asin economia digdi.
Si Peña an padagos na naghuhurot kan suporta asin asistencia kan Department of Tourism (DOT), National Commission for Culture and the Arts (NCCA) asin iba pang ahencias kan gobyerno asin pribadong sector tanganing ibusol an mga programa dapit sa turismo, cultura.asin economia.
Prioridad na turismo kan banwaan iyo an religious asin pilgrimage tourism, tampok an Archdiocesan Shrine of Saint Joseph, simbahan sa barangay Sabang ni San Padre Pio de Pietrelcina asin an Amang Hinulid sa barangay San.
Sa mga masunod na bulan, linalaoman na orug pang mabaskog an turismo sa banwaan na ini sa paagi kan sarong Tourism Hub na ilalatag sa Talisay Port, sa barangay Dolo. Ini pigtutubodan na malaag sa San Jose Partido sa sarong prominenteng lugar sa tourism map kan Kabikolan.