MPS blangko pa sa pambabadil sa vehiculo sa opisyal kan DA

Pili, Camarines Sur --- An Municipal Police Station (MPS) sa banwaan na ini padagos pa kan ginigibong inbestigasyon sa pambabadil nin apat na veces kan calibre .45 badil sa vehiculo ni Engineer Teodoro Ileda, assistant chief planning division kan Department of Agriculture.

An mga inbestigador padagos pang pig-eestabliser an motivo sa pambabadil sa Montero Ford mientras naka-garaje ini kan mangyari an insidente kan Marso 6 alas 8:00 nin banggui sa Ileda Compound sa Barangay San Jose, Pili, CamSur.

Nasa official travel si Ileda kan DA Bicol kan mangyari an insidente mantang an saiyang esposa iyo an nagsombong sa Pili MPS.

Sa inbestigasyon kan MPS apat nin bala kan calibre .45 an tama sa vehiculo asin kan magdulag an riding-in-tandem nagpalayog pa nin gapo sa laguerta kan familia Ileda na patos nin papel na igwa nakasurat nin homa sa buhay.

Alagad sinabi ni Acting Mayor Francis Belen kan banwaan nin Pili, CSur an insidente posibleng may koneksyon sa trabajo kan opisyal kan DA Bicol.

Igwa man nin osip na duwang motorsiklo an gamit kan magkasunodan na riding-in-tandem an iribahan na padagos pang pighahanap kan awtoridad.

Hagad kan MPS an cooperasyon kan mga testigos o nakaheling kan insidente asin posibleng nakuanan pa nin CCTV camera.

An ibang empleados kan DA na nakakabisto ki Engr. Ileda nagsabi na mayo man sindang aram na igwang kalaban o mayka-angotan saiya.