Mrs. sinaksak kan esposo, gadan
Naging mamundo an pagpuli kan sarong esposa hali sa pagtrabajo sa nasyon kan Kuwait alagad huli sa pagsilos tinapos an buhay sa paagi nin saksak kan saiya man sanang esposo na ginibo pa sa atubangan kan saiyang duwang aki na mga menor de edad.
Sa report kan Municipal Police Station kan Bombon, Camarines Sur an biktima si Marilyn Adante Boaquina, 32, na nagpuli sa Filipinas kan Noviembre 27, 2022 sa inbestigasyon ipinahayag na naging harayo na an boot sa pakikiiba sa saiyang agom na si Salvador Boquina. Afuera pa kaini, envez na magturog sa saindang residencia alagad nagtuturog sa magurang kan ina sa balyo man sanang residencia sa Barangay. Siembre, Bombon.
Kan magpuli asin magturog sa esposo sa Barangay Siembre, Bombon kan Deciembre 12, 2022 mga alas 8:00 nin banggui mientras na yaon sa cuarto an duwa asin nagtuturog an biktima sinaksak nin nagkaperang veces an biktimang si Marilyn kan agom na si Salvaldor gamit an saindang sundang.
An suspechado tolos nagsuko ki Brgy. Kagawad Honorio Bolado sa Brgy. Siembre na pig-turn over tolos sa MPS. Pig-osipon pa an suspechado dai man pinapadarahan nin cuarta kan esposa asin sa saiya nang ina.
Pigdalagan pa sa hospital alagad pigdeclarang dead on arrival (DOA) kan doktor huli kan maabot sa sampolong tama nin saksak sa tulak asin manlaen-laen na parte kan hawak.
Kasoodma sinangat na kan familya kaibanan an MPS an casong parricide.
An kaparejong caso nangyari naman sa Ocampo, Camarines Sur na tolos man nagsuko sa awtoridad an suspechado.
An esposa kan magpuli dai man nagpeperming magturog sa saiyang agom asin sa saiyang tugang na nag-eestar sa kataid man sanang residencia.