MSMEs kan Goa Awardees sa DTI Trade Fair

Ni Sonny Malate

GOA, Camarines Sur --- Duwang Micro, Small, Medium Enterprises (MSMEs) kan banwaan na ini an nakaguno nin Plaque of Recognition sa ginibong Feria de Camarines - Negocio Nuevo kan nakaagin semana sa irarom kan Department of Trade and Industry (DTI) Camarines Sur sa pamamayo ni Provincial Director Jay Percival S  Ablan.

An duwang MSMEs iyo an Roselle Integrated Farm, sa barangay Tagongtong ni Roselle Nocedal, kaggibo kan Roselle red wine. Ini gikan sa burak kan tinanom asin  napiling Most Innovative Product - Food Category. 

Nakabale man sa Featured MSMEs an MG Food Products na pagrurugaring ni Salvacion C. Garchitorena kan Barangay Pinaglabanan. An sadit na negosyo ni Garchitorena nagpoon bilang saro sanang kalingaan kan taon 2015. Ini pigparehistro sa DTI, nag-aprobechar nin mga training asin recipiente nin libreng hydrator sa DTI. Sa ngonian an MG Food Products ruminambong na asin burabod nin dagdag ganada sa mga trabahador digdi.

Booth kan MSMEs kan Goa sa Trade Fair kan DTI (Rhea De Alday)

Segun ki Rhea De Alday, DTI Negosyo  Center Business Counselor, an saindang oficina dakula an suporta sa mga entrepreneur kan Goa kun kaya nagin contribuente  sinda sa pagparambong kan mga saradit na negosyo ninda.

Sa paagi kan pagparticipar kan mga MSMEs sa mga trade fair na pigpapadrinohan kan DTI, an mga local na producto nabibisto asin naibebenta sa mga mercado local asin international.

Sinabi ni De Alday na an Negosyo Center pigbukasan sa mga local na gobyerno tanganing mapaharani an saindang servicio sa mga banwaan, asin dae na kaipohan na magdayo pa an mga residentes sa saindang provincial office sa ciudad nin Naga.

Apwera sa Goa, igua pa man Negosyo Center sa banwaan kan Lagonoy, Presentacion, Caramoan, Tigaon, Tinambac asin Siruma. 

Saro sa mga madaling nasisimbagan sa mga Negosyo Center iyo an an  Business Name registration na marikas na nakukua digdi.

Dagdag pa ni De Alday, an DTI padagos sa pagtao nin mga training asin dagdag kaaraman sa mga local na negociante tanganing maparambong an saindang paghahanap buhay sa tahaw  kan makabagong teknolohiya, pangangaipo nin dagdag na capapital asin iba pang hamon na kinakaipohan masimbagan.

Mientrastanto, dakula an pasasalamat kan Business Counselor sa suporta na piigduhol kan local na gobyerno kan Goa sa pamamayo ni Alkalde Marcel S. Pan sa pitong mga MSMEs kan Goa na participar sa trade fair kan DTI.

Siring man sa mga oficiales kan barangay sa Goa na pirming nagsusuporta asin nagcocooperar sa mga programa kan DTI na pig-iimplimentar digdi.