Muklat na Nangiturogan

May mga semana na naglalamag kita nin oras dara kan dakul na trabaho o mga bagay na kaipuhan mahaman sa laog nin limitadong panahon. May mga semana man na mayong gayo nin gibohon na minadara nin pagmate nin kalangkagan.

Sa enot na scenario, naghahanap kita nin bakasyon. Sa ika-duwa, naghahanap kita nin libangan na gibo para maparikas-rikas ang dalagan kan oras. May mga aldaw na gusto ta mag-lawig ang aldaw, igua man gusto ta matapos tulos.

Sa kaso ko, sa kasibutan kan mga aldaw na nag-aabot, lingaw na ako kan mga nangyari suodma. Huru-halawig na proseso ang paggiromdom asin pagsaro-saro kan mga nahaman kan mga nakaaging aldaw.

Pinoproteheran ang aldaw nin Domingo kan kada semana para magpahingalo. Tubod ako na ang tao dai krinear kan Mahal na Dios para magtrabaho sana o magparaturog sana.

Iba ang dalagan kan buhay ngonian.

Dakul na akong istoryang nadangog tungkol sa mga taong nanganaan trabaho. Igua akong kaolay na may halangkaw nang katongdan sa trabaho sa saindang organisasyon maski huben pa siyang maray. Inistoria niya sako na nag laylo muna siya dahil sa duwa niyang amigo na matua saiya pero mga huben pa man, amay na nagmate ta naging workaholic kan saindang kasagsagan na edad.

Igua man akong mga na-encuentrong istoria kadaklan mga paraoma, naglalawig ang buhay maski oroaldaw balad sa saldang asin pisikal na maray ang kapagalan alagad may mga bisyo. Ang ibang kabisto kong mga paraoma sitenta na, nag-ooma pa. Maluya daa sinda kung magpundo sinda sa paghiro.

Pareho routine, mga gawe kan trabaho sa oro-aldaw, alagad bakong pareho ang resulta. May mas nalawig, may mga halipot sana ang dalagan. Bakong pareho ang kakayahan magpahingalo asin mag-ogma kan bunga kan mga pinagalan.

Mas masiram ang tubig pag medio paha na ang pagmate, kasakitan sa pagmate pag dai naman paha asin nagpipirit pa mag-inom. Budal sa tulak. Siring man sa pag-kagutom. Garo si giniling na linuluto kan Lolo ko kadto sa Igualdad pag pangudto. May kapartner na prinitong tuyo.

Tuak pirmi tulos ang kombinasyon kan giniling asin tuyo nakababaw sa bagong sapnang maluto. Puerte mag-kamot!

Ubos tulos pirmi ta linuluwag, alas dose y media na. Gurutom na gabos. Kaya nanggad masiram man talaga sa pagnamit ang kakanon lalo na kung gutom.

Giromdom nindo si istoria kan sarong solterito na nagraduar pa sana sa kolehiyo asin nagpahingalo muna bago nag-apply trabaho?

Sarong hapong nagsiesta siya, pag mata niya, nagkukurahaw asin nagdadaradalagan pasiring sa saiyang ina, “Ma! Ma! Napangiturogan ko may trabaho na ako!”

Garo naogma man si ina, nagsabi, “Ay iyo noy?! Sige na, magturog ka giraray para makua mo si sueldo mo!”

Kang enot ko ining nadangog hale sa dati ming driver sa opisina, si Cho Rigor, grabe si pusngak mi sa opisina.

Ano ang leksyon kan ma-consuelong istoria?

Simple. Ang mga pangiturogan mahahaman kung kita mamata asin mabungkaras asin matrabaho hanggang marealizar ang mga ini. Sabi ngani ni Exupery, ang kagsurat kan librong “The Little Prince”, “a goal without a plan is just a wish”.

Ang satong mga mawot makua asin ang gusto tang magin, sinasabayan plano asin aksyon hanggang sa makaduman. Igua sana nin pagiromdom pirmi para sa gabos, dai nanggad malingaw mag-hangos.