Mulo Vs. Fortuno Jr.

Babae kontra Lalaki, iyan an ralaban pulitika sa Naga asin sa provincia nin Camarines Sur. Digdi sa Naga City, mainit na an pulitika ninda Mayor Nelson Legacion asin dating Bise Presidente Leni Robredo. Orolay olay na ngonian an pangaran ni Senadora Laila de Lima na iyo an makakalaban ni Governor Luigi Villafuerte para sa Camarines Sur. An mga pulitiko mayong pinag iba sa mga tink-tank sa giyera na matibay sa mga pasikot sikot nin scenario tanganing ribongon an kalaban o an mga botantes. An kantong putikon maisog na nagdeklara sa saindang kapihan sa SMCity na dai nanggad minatubod na si Legacion madulag ki Leni sa pagka Mayor kan Naga kaya nagtataga pasyar sa tercer destrito ta madalagan sa pagka kongresista. Sigun sa mga para sopsop nin Hot Choko sa Kantong Putikon, dai madalagan sa tercer destrito si Legacion ta iwinalat na siya nin milya-milya ni Nonoy Magtuto na haros pinasumpa na an mga Kapitan asin mga alcalde sa tercer destrito. Afuera kayan, mismong an kusog kan kapitolyo an saiyang babanggaon ta si Nonoy siguradong susuportaran kan mga Villafuerte. Sigun ki Engr. Louie, kun si Legacion magdalagan sa pagka kongresista tangani sanang magdulag sa babae, puwes, kangingiritan an saiyang aabuton ta dai man siya puedeng tabangan ni Madam sa Naga ta minsan pa siyang pig kritisays sa padalagan niya sa Ciudad nin Naga. An mga taga Kantong Putikon, marigmat an mga mata sa pag masid sa palibot en kaso makapasyar sa lugar si Mayor ta ini papahigopon nin Hot Choko asin papa akabon nin Donut tanganing mag orolay kan pulitika. Gusto kaya kan mga “Philosophers” sa SM na labanan ni Legacion si Leni ta gulping mga taga Naga an kumbinsido na mas gulping naginibo si Legacion sa Naga na dai ngani naginibo ni Madam. Si Joe, nagtutubod na overwhelming ang kaganahan ni Legacion kontra ki Leni ta si Mayor ngonian an pig sasamba kan ibang yaon sa 4 Ps asin iba pang sanggawadan. Sa orolay pulitika sa Camarines Sur, tunay na polpogan an mangyayari ta nababagay na isabat ki Gov. Luigi, iyo si former Senator Laila de Lima. Inot na ma celebrar sa labanan kan duwa iyo an mga taga media na paha asin langkag na sa Press Conference ni Luigi. Nagtutubod an mga political analyst na sa tanganing makusog an kandidatora ni Laila, dapat kuanon niyang bise gobernadora iyo si Bokal Mulo Hernandez. Si Mulo na pig bibistong Kagurangnan sa Libmanan mala ta dai nanggad ini nadadaog sa lutsada, iyo an makontribuer nin suporta ki Laila ta dakula an Libmanan, kadakol nin botantes arog man ni De Lima na kapot an Rinconada kaya gulping makukuang voto. Nagtutubod an mga para kakan nin Donut sa Donut Lie na puedeng magtukal sa Villafuerte si Mulo ta omoy na ini sa pagiging Bokal na kutana siya an nasa puesto ni VG Fortuno, sa laban na Fortuno Vs. Mulo, mas makusog si Mulo ta ini haloy nang iguang pigmamantiner na mga makukusog na lideres sa first asn second district. Kung sabagay, arog man ni Gov. Luigi, si Vg Fortuno, nagsisikat sa mga kadaragahan ta ini guapo, halangkaw, asin minsan pang nagpasikat sa pagiging parakanta kan saiyang irelease sa market ang saiyang first 45 rpm na sonata na may titulong “ Kikay “.