top of page

Municipal hall kan Goa may elevator

GOA, Camarines Sur --- Nagkatotoo man giraray an haloy nang pangaturogan kan mga Persons Wth Disability (PWDs) sa banwaan na ini na magkaiguang  elevator sa municipal hall digdi. 


An paglaag  nin elevator sa edificio municipal sinabat nin labilabing kaogmahan kan mga oficiales asin miembros kan Federation of Goa Associations of Persons with Disability mantang haloy na ninda ining pigmamawot.


An elevator namumugtak sa convenienteng lugar sa right wing o toong parte kan municipal hall.


Segun ki Marlon Belaro, Focal Person kan federation, an facilidad madarang dakulang kageanan sa grupo ninda kun  may mga transaction sa ikaduwang eskalon o magin sa rooftop kan edeficio municipal na puwedeng gibohon venue kan meeting asin ibang pagtiripon.


Sa presente, an mga PWDs digdi an kinakaipohan pang mag-agi sa hagyanan kan municipal hall. Ini dakulang kadeficilan asin kapitiwan orug na sa mga may saklay asin ibang problema sa  tabay o bitis. Sa pagkakaigua kan arog kaining facilidad madali na an saindang pagsakat sa ikaduwang eskalon o magin sa rooftop.


Katakod kaini,  sinabi ni Belaro na husto na sana an pasasalamat kan grupo ninda ki Alkalde Marcel S. Pan sa pag-initiar kan bagong proyektong ini. Manonotaran  na an alkalde sustenido sa  paghatod nin libreng mga  serbisyo asin proyekto sa mga may kadinan sa hawak asin magin sa mang-iba-ibang sector kan comunidad.


Sa kadaklan na vez, an mga libreng serbisyo asin proyektong ini an naghatod nin dakol na premyo ki Mayor Pan asin local na gobyerno kan Goa hale sa iba-ibang pang nacion na award-giving bodies.


An rehistradong mga PWDs  sa Goa nag-aabot na sa 1,714. Sa ngonian, kadaklan sa sinda may mga income-generating project tanganing magin productibo sa comunidad.


An elevator iguang alocasyon na P2 Milyones  (P2M) Pesos hale sa fundo local. Sarong contratistang nakabase sa Metro Manila, an Verlifts, Inc. an natukahan kan proyekto. An elevator user-friendly asin sa sunod na mga  semana ini an puwede nang gamiton. 


Initialmente, iguang assistant an elevator alagad sa sunod na na mga aldaw   ini puwede nang gamiton na mayong maasiste sa magamit kaini.


Segun ki Belaro an elevator bakong exclusibong gamit  para sa PWDs sana kundi magin sa Senior Ctitizens asin bukas sa ibang  sector kan comunidad.


Mientrastanto, an Goa Cultural Complex piglalaagan naman nin airconditioning unit sa pagmawot kan local na gobyerno na ini magin conveniente asin fresco para sa mga magamit kaini.


An complex kan Goa parating piggagamit kun iguang mga actividades bako sana para sa mismong banwaan na ini kundi magin pagtaraid na lugar.


An pagkakaiguang elevator sa edificio municipal asin airconditioning unit sa cultural complex kan Goa iyo an pinakaenot  sa sarong banwa digdi sa Camarines Sur asin posibleng sa bilog na rona kan Bicol.


Elevator sa Municipal Hall kan Goa, Camarines Sur, on-going an construction. (Photo: LGU Goa)

Комментарии


bottom of page