Municipalidad kan Gainza drug cleared na sa CamSur

Tolong taon nang mantenido kan Gainza, Camarines Sur an pagiging Drug-Cleared Municipality asin iyo sana sa 35 mga banwaan asin duwang ciudades sa provincia na declarado kan opisina rehiyonal kan Philippine Drug Enforcement Agency (PDEA).


Sa entrevista kan Bicol Mail ki OIC Chief of Police P/Lt Joan A. Mabini, sinabi kaini na kan 2019 nagkaigwa na nin deliberasyon asin ebalausyon an PDEA asin an resulta drug-cleared an saindang banwaan.


Alagad narecibe kan Gainza MPS asin LGU Gainza an Plaque of Recognition award hale sa PDEA Region V bilang Drug-Cleared Municipality kan Enero 16, 2020 sa ginibong programa sa Camarines Sur Convention Center, Pili, CamSur.


Sa deliberasyon asin awarding kan Municipal drug cleared kan Hunyo 24, 2022 sa Sangguniang Panlalawigan kan Camarines Sur session hall, legislative building kan Capitolio Provincial, CamSur liwat pigrecibe ni Alcalde Leonardo Agor, Gainza MPS COP /PLt. Mabini asin MHO Officer Dr. Vincent Bryan Balaong an kaparejong onra.


Sinda PDEA RD Atty. Gil Pabilona, CSur PDEA PD Mark Anthony Viray asin PNP CamSur DPDA Lt. Col. Roberto Capus iyo an nagtao kan Plaque of Recognition award.


Saludo an PDEA Bicol sa LGU Gainza asin MPS huli ta padagos na mantenidong drug-cleared an banwaan, apesar na harani sa Ciudad nin Naga asin Camaligan, CSur na parating may nadadakop na mga envuelto sa ilegal na droga.


Dakulang bagay digdi an pagtarabangan sa kampanya laban sa droga iyo an lokal na gobierno sa pamamayo ni Alcalde Asor, Gainza MPS, opisyales de barangay, Barangay Anti-Drug Abuse Council (BADAC) asin kan komunidad, sabi pa ni P/Lt Mabini.


An Gainza, sarong 4th Class Municipality asin kompuesto nin walong barangay.


Sa pinakahuring census kan 2020 kan Philippine Statistic Authority (PSA) sa Camarines Sur an banwaan na ini igwang 11,584 na populasyon.


Sa ngunian an PDEA padagos an paglibot sa mga banwaan sa Camarines Sur asin iba pang provincias nganing hagadon sa mga LGUs asin MPS na magtarabangan sa kampanya laban sa droga nganing marealisar na drug-cleared an saindang mga area of responsibility. (DPAureus)

Deliberasyon asin awarding kan Municipal drug-cleared kan Hunyo 24, 2022 sa session hall kan Sangguniang Panlalawigan kan Camarines Sur. Sinda Gainza Mayor Leonardo Agor, Gainza MPS COP P/Lt. Joan A. Mabini, asin MHO officer Dr. Vincent Bryan Balaong iyo an nagrecibe kan onra hali sa PDEA RD Gil Pabilona, CamSur PDEA PD Mark Anthony Viray asin P/Lt. Col Roberto Capus, DPDA CamSur.