Mural paintings vs NPA

Ika-52 na aniversario kan pagkakatugdas kan New People’s Army (NPA) kan Marso 29 alagad an PNP Provincial Office kan Camarines Sur sinabayan an aldaw na ini kan pagpadreno nin ‘‘mural painting’’ na magdedenuncia kan mga paghasok nin kariribokan kan rebelde nganing ipaheling na isinisikwal na sinda kan namamanuan.


Alagad an mga participante hale sa manlaen-laen na Municipal Police Station sa mga banwaan kan Camarines Sur, Philippine Army, Department of Social Welfare and Development (DSWD) asin mga colegio.


Si Police Major Louie Dela Peña, jefe kan Police Community Relation Office kan PPO CamSur nagpahayag na an isyu sa painting an dapat tawan nin duon iyo an mga ‘‘atrocities’’ kan kalaban kan gobierno.

Nakasurat sa sako an mga pagdenuncia contra sa NPA alagad bako lang ini sa Canaman, Camarines Sur asin Ciudad nin Naga envez haros nakawarak sa manlaen-laen na banwaan kan provincia alagad pinapahimotikan kan mga awtoridad na sinda man sana an nasa likod kaini. (dpa)


An ibang progresibong grupo na habo nang magpa-sambit kan saindang orginisasyon nagtutubod na an arog kaining proyecto magsasayang sana nin panahon mantang risadong propaganda sana.


Alagad sinabi pa kan opisyal na saludo sinda sa namamanuan huli ta suportado an saindang campanya laban sa insurhencia mala ngani nagbugtak na nin sadiring karatula sa manlaen-laen na kanto na nakasurat sana sa sako na nag-dedenuncia sa mga gawi kan rebeldeng NPA.


Afuera pa kaini, nagkaigwa pa nin rally an mga awtoridad bitbit an mga placards contra sa CPP/NPA na ginibo sa Plaza Quezon kan Ciudad nin Naga.