Muslim Community mayo pang desisyon magpabakuna

Nagkakasararo an Muslim Community sa Ciudad nin Naga asin Camarines Sur na dai sinda mapatudok nin bakuna contra sa coronavirus disease (Covid-19) kun mayong konsultasyon sa National Commission on Muslim Filipinos (NCMF).


Iyan an desisyon kan grupo alagad dai sinda nagcocontra sa ano man na policia kan local IATF laban sa virus.


Si Mike Mustapa pamayo kan organisasyon kan Muslim sa Naga asin Camarines Sur nagpahayag sa Bicol Mail kun magpaluwas nin desisyon an NCMF sinda andam magpatudok bakuna ano man na oras.


Sa press conference sa City Hall kan Martes, Agosto 3 sinabi ni City Health Office Dr. Vito ‘‘Butch’’ Borja na andam sindang atubangon an comunidad kan Muslim tanganing ipaliwanag kun ano an karahayan kun bakunado na nin duwang veces nin vaccines.


Inako kan opisyal kan CHO na dawa bakunado na dai man nahahale an peligro sa virus, alagad tamaan man kan virus dai nang gayo marurugado sa helang.


Sinabi ni Mustapa na igwang mga negativong reaksyon an saiyang pag-iriba sa tahaw kan mga nagluluwas na report sa national TV na nagsasapo nin epekto sa salud an natutudokan nin bakuna.


An City Hall padagos an saindang pag-enganyar sa mga residentes kan ciudad na magpabakuna nganing makalikay sa virus mantang target an 70 por ciento kan 209,000 na populasyon na mabakunahan nganing mangyari digdi an inaapod na herd immunity. (dpa)