Muslim Community sa Naga dai mapalaog Afghan refugees

Dai hinahale kan Muslim Community sa Ciudad nin Naga na posibleng igwang makaabot sa Filipinas na Afghanistan refugees alagad mayo sa plano kan grupo na akseptaron bilang mga evacuees lalo na kun sinda mga rebelde o grupo pa kan Taliban.

Parejong si Allah an saindang Diyos bilang mga Muslim alagad kun sinda sibilyan Afghan puedeng tawan nin kunsiderasyon komo kapwa Muslim.

An Muslim sa Afghan ibang grupo nin tripo lalo na kan Taliban sinda grupo nin sindikato pirming palaban sa gobierno mayong katuninongan asin yaon sa sainda an mga suicide bomber.

An militanteng grupo na-organisar bilang Islamic guerilla fighters na mas midbid sa mujahideen.

Iyan an mga pahayag ni Mike Mustapa, lider kan Muslim Community sa Ciudad nin Naga kasunod kan mga nagluluwas na inpormasyon na ribo-ribo nang Afghanistan refugees an nakakaabot sa ibang mga nasyon mantang nagdudulag sinda sa masakring ugali kan Taliban na mayong respeto sa kapwa ninda kahimanwa.

An Taliban pig-take over an gobierno kan Afghanistan sa Kabul puon kan Agosto 17 hasta sa ngunian asin grabe pa an tensyon asin nagdudurolag na naghahanap nin matuninong na nasyon.

Kan magkaigwa nin halawig na guiera sa Ciudad nin Marawi matapos magsakyada an Maute group, warak an mga Muslim hale sa sinambit na ciudad na nag-evacuar mala ngani nakaabot sa Ciudad nin Naga alagad bilang mga tugang ninda hale sa Mindanao inako kan City Hall asin man kan Muslim Community digdi.

Pigbuyagyag pa ni Mustapa na iba an kultura asin tradisyon kan Muslim sa Afghanistan kumpara digdi sa Filipinas na mawot mabuhay sa matrangkilong lugar.

Sinabi na kun igwa man naghahasok na kariribokan na Abusayap sa Mindanao bako man sindang tunay na Muslim asin sinda mga bandido na envuelto sa mga kariribokan, kidnapping asin mga tulisan.

An tunay na muslim sa Mindanao mabuboot mayong ugali na mag-envuelto sa mga suicide na pambubomba. (DPAureus)