Nag-aatubang nin show cause order nagdadakul

Nagdadakul na an mga candidato sa Barangay, Sangguniang Kabataan Elections (BSKE) sa Bicol alagad an Camarines Sur asin Albay iyo an may halangkaw na caso na nag-aatubang nin show cause order sa Task Force Against Premature Campaigning kan Commission on Election (Comelec) Central Office an iba namemeligrong madiscalificar an saindang mga candidatura.

Kinumfirmar ni Ma Juana Valeza, regional director kan Comelec Bicol na maabot na sa sangatos na mga candidato sa barangay asin sangguniang kabataan alagad dai naman pinaluwas an saindang mga pangaran huli sa amay na pangangampangya.

Kan nakaaging semana igwa sana nin 70 mga candidato alagad mantang nagrarani na an campaign period nagdadakul an pigrereclamo sa task force.

Sa Ciudad nin Naga na dating igwa sanang treceng mga candidato an na-isyuhan SCO asin sa ngunian uminabot na sa 24.

Nagpatanid an Comelec na dapat simbagon sa laog nin tolong aldaw oras na marecibe an show cause order alagad kun mapabaya kan saindang deretso namemeligro an saindang candidatura.

An mga lokal na opisina sana an naserbe kan noticia sa mga candidato asin an simbag dapat ipadara sa task force sa paagi nin E-mail Ad sa Comelec Manila.

Nagpaluwas na nin press release an Task Force na an saindang desisyon nakatalaan ipaluwas antes kan eleksyon sa Oktubre 30, 2023 mantang si ibang caso puedeng madesisyonan pakatapos na kan pirilian alagad kun manggana si mga pigrereclamong candidato pendiente ngona an proklamasyon.

An aksyon na ini nagpapaheling na nagiging estrikto ngunian an commission sa pagbantay kan mga pasaway na candidato sa rehiyon.

An campaign period sa BSKE dapat magsikad poon Oktubre 19 hasta 28 asin an pirilian pigtalaan sa Oktubre 30.