NAG-IRIHI SA CALSONSILYO!

Tigsik ko an no’noon pang candidato

Sulog pa po kaya trying hard an rapado

Nakatangad sa estilo kan saiyang lolo

Habong butasan kan pamilya an saindang trono!

Tigsik ko an sistema kan satong poltica

Siring kan dati, lapa saka makasuka

Anas sana promisa saka pambobola

Puro sana  plata mayo man sustancia!

Tigsik ko an nagimatan kong politica

An nasa poder saro sanang pamilya

Orug na nagyayaman, sablok na buaya

Gutom an banwa, nakaburarat an mata!

Tigsik ko an politica sa satong probinsya

Ay salamat ta bihira man an violencia

An laban anas sana man blah, blah, blah

Garong sagmaw an rapak sa patutsada!

Tigsik ko an paaboton na pirilian

An lapang sistema dapat nang talikdan

Paurogon an karahayan kan banwaan

Gibohon na malinig, isikwal an darayaan!

Tigsik ko an gurangan nang politico

Habo nang butasan an masiram na puwesto

Uugod-ugod na, mayo na sa tamang wisyo

Pagcampanya, nag-iihi na sa calsonsilyo!