Naga idedeclara nang ‘Pink Zone’ kan BAI
Dawa zero na sa caso sa African Swine Fever an Ciudad nin Naga alagad hinahalat nalang kan City Veterinary Office (CVO) kan lokal na gobierno kan Ciudad nin Naga an desisyon kan Bureau of Animal and Industry (BAI) nganing ideclara an ciudad bilang pink zone o zero na sa caso sa ASF.
Si Junios Elad Jr, jefe kan CVO nagsabi na kumpleto na sinda sa documentary requirement na hinahagad kan BAI alagad sagcod na mayo pang kumfirmasyon an sinambit na ahencia padagos pang nasa bandera sa red zone o nasa ASF pa sa ciudad.
Kasunod kan kumfirmasyon na zero na sa caso sa ASF an ciudad, an Department of Agriculture (DA) Bicol kan nakaaging semana nagdistribuer na nin 300 na ‘‘sentinel pigs’’ sa mga paraoma na nag-aataman nin orig alagad dating apektado kan virus sa hayop.
An DA nagtao pa nin libreng tigsararong sakong feeds sa paraoma nganing makasumpay nin amay sa pambahog sa mga sentinel pigs na papadakulaon kan mga benepisyaryo.
An sarong LGU dai idedeclarang zero na sa caso sa ASF (Pink zone) sagcod na dai pa napaluwas nin kumfirmasyon an BAI dawa na ngani an Ciudad nin Naga negativo na sa caso sa virus.
Sa pinakahuring listahan kan DA, ipinahayag na mayo na nin activong caso kan ASF afuera kan barangay Sta. Elena, Camarines Norte na controlado an caso.
An hog raisers maging paraoma sa barangay na nag-aataman kan kaparejong hayop mayo nang pigsosombong sa pagbuelta kan virus sa hayop sa saindang barangay dahilan nganing ipadagos an saindang pag-ataman asin darahon sa mercado.
Sa Camarines Sur, sinabi ni Lovella Guarin, regional information officer kan Department of Agriculture sa Bicol na mayo nang report sa mga barangay maging sa hog raisers na nabuhay na naman an ASF.
An problema ngunian iyo an ibang mga lokal na gobierno dawa zero na sa caso an ASF an saindang lugar alagad dai pa puedeng ideclara na ‘‘ASF free’’ sagcod na dai pa nakakasumiter nin mga dokumentos sa pigtaong guidelines kan BAI.
Saro sa mga hinahagad kan BAI asin DA nganing ideclarang ASF free iyo an Municipal ordinance on adoption of BABAY ASF.
Sa ngunian maabot pa sa 20 mga LGUs dai pa nakakasumiter sa BAI kan mga minasunod ‘‘Red zone’’ pasiring sa ‘‘Pink zone’’. Municipal Ordinance on adoption of BABAY ASF, Summary of ASF history, List of trainings on Swine Biosecurity attended by hog raisers and LGU staff, asin Farm, registry of town and membership to Registry System for Basic Sectors in Agriculture. Kun makasumiter na kan rekisitos kan BAI puede nang ideclara ASF free alagad dakul pa an nagsisinutil.
Dakul nang paraoma an nagbuelta na sa pag-ataman nin orig kasunod kan pigtaong libreng ‘‘sentinel pigs’’ kan DA Bicol. (dpa)