Naga igwa nang 101K votantes

Limang bulan antes kan ultimo diya kan continuing registration sa Commission on Election (Comelec) para sa eleksyon nasyonal asin lokal sa Mayo 9, 2022 an Ciudad nin Naga igwa nang rehistradong 101,303 na mga votante.

Sagcod sa Septiembre 30, 2021 an huring aldaw kan pagpa-rehistro kan calificadong votantes na nag-eedad puon 18 anyos pasakat an Comelec sa ciudad naglalaom na maabot pa sa diez mil an mahabol nganing makaparticipar sa pirilian nurong taon.

Ini an mga pahayag ni Abogado Maico Julia Jr. Election Officer kan ciudad alagad saiyang piglinaw na hinale na ninda sa listahan nin mga votante na duwang veces nang dai nagvovoto na posibleng an iba binawian nin buhay kabale na si mga nagbalyo nang lugar asin nagpalista bilang transferee.

Alagad tinutugot giraray kan commission an pagpa-activate nganing makacierto na makaparticipar na sa eleksyon.

Sinuspende na kan commission an mga ginigibong satellite registration sa barangay kasunod kan padagos na paglangkaw kan coronavirus disease (Covid- 19).

An desisyon kan Comelec nganing ilikay an saindang mga election officer asin personajes na maulakitan kan ‘‘deadly virus’’ na sagcod sa ngunian iyo pa an problema kan gobierno mantang limitado pa an nag-aarabot na suplay kan bakuna hale sa ibang nasyon.

An direktiba sa mga election officers dapat estrictong ipasunod an health protocols sa nagpapadagos na continuing registration.

Si Julia, opisyal na parataram kan Comelec sa Camarines Sur nagpahayag pa na mahalat sana sinda kan bagong memorandum kan saindang opisina central kun nuarin ibabalik an satellite registration.

Si enot na programa kan Comelec sa pagpa rehistro sa mga barangay nakatabang nganing makua an target registrants alagad sinuspende huli kan virus. (DPAureus)