Naga igwa nang simbag sa speed limits kan LTO

Hahagadon kan Land Transportation Office (LTO) Bicol sa mga lokal na gobierno na magpasar nin ordinansa nganing estrictong iimplementar sa saindang jurisdiksyon an tamang speed limit sa dalagan kan mga vehiculo asin makatabang sa saindang kampanya na magbaba an mga aksidente sa tinampo.

Alagad an lokal na gobierno kan Ciudad nin Naga igwa nang na enot na ‘‘Naga City Speed Limit Ordinance’’ na naaprubaran sa Sangguniang Panlungsod sa paagi kan Ordinance No. 2019-099 padreno si Consejal Joselito Del Rosario.

Si Del Rosario, chairman kan Committee on Public Transportation sa SP nagpahayag na kun magbisita sa Naga si LTO regional director Francisco Ranches, andam sindang makiatubang kun igwa pa siyang propuesto sa presenteng ordinansa.

Sa pagkumemorar kan World Day of Remembrance for Road Victim kan Noviembre 21, 2021, sinabi ni Ranches na padagos an saindang ginigibong advocacia laban sa mga aksidente sa tinampo asin saindang target ngunian na taon na maibaba sa 30 por ciento.

Sa record kan LTO Bicol sa peryodo puon kan Enero hasta Agosto 2021 sa panahon kan pandemya, sa Ciudad nin Naga igwang biktima sa aksidente nin total na 523, apat gadan, asin 158 mga iredo. Sa Camarines Sur igwang 736 na aksidente, 57 gadan, asin 752 mga iredo.

Sa ordinansa kan City Hall nagtalaan sinda nin speed limits sa mga tinampo na dapat 30kph sa gabos na klase nin vehiculos. Alagad an speed limits na ini natutuyawan kan namamanuan kan ciudad huli ta dai man na-iimplementar sa kaskason na nagpapadalagan nin motosiklo.

An mga tinampo na sakop kaini iyo an city asin national road maging provincial road. An ‘‘crowded streets’’ sa ordinansa kinababalihan kan heavy pedestrian traffic, gabos na kalye sa laog kan ‘‘500 meters radius of the perimeter’’ kan mga escuelahan, mga pigta-trabajohan na lugar, recreational places, shopping malls, hotel asin restaurant.

SPEED LIMIT. Bago hagadon kan Land Transportation Office sa mga LGU na magpasar nin ordinansa kontra over speeding, estrikto nang pigpapasunod sa ciudad nin Naga an ordinansa na naglilimitar sa rikas kan mga vehiculo.

Alagad igwang exemption sa mga emerhencia arog kan mga doktor o health workers na nagreresponde sa apod nin emergencia. Mga tsuper na nagdadara nin mga pasyente pasiring sa clinic o hospital asin AFP na nag-aapreta sa saindang operasyon laban sa insurhencia.

An PNP, Public Safety Office, barangay tanod asin iba pang volunteers traffic enforcer iyo an maimplementar.

Si mga nagsisinutil sa premirong pagkakadakop mamulta nin P3,000 asin apat na oras na seminar sa road safety; sa ika-duwang pagbalga P4,000 asin apat na oras na seminar sa road safety asin sa ika-tolong veces P5,000 asin impounding kan vehiculo asin 30 diyas na pagkaka preso depende sa diskreasyon kan jusgado. (dpa)