Naga, liwat dadayuhon nin turista sa Festividad ni Ina

Duwang taon apektado an Ciudad nin Naga sa tourist arrival huli kan pandemya alagad kun dagos-dagos nang mantenido an alert level 1 sundo sa Peñafrancia fiesta sa Septiembre ngunian na taon dakulang bagay sa pag-uswag kan economiya.

Ini an proyeksiyon ni Consejal Sonny Rañola, pamayo kan Committee on Tourism sa Sangguniang Panlungsod mantang nag-aandam na an lokal na gobierno kan mga actividades maging an Archdiocese of Caceres kan maabot na Festividad ni Ina.


An selebrasyon sa Septiembre ngunian na taon iyo an ika-312 taon kan debosyon kan Our Lady of Peñafrancia.


Posibleng i-adaptar kan Caceres an mobile procession ki Ina siring kan ginibong Peñafrancia de Mayo ngunian na taon na binalik matapos kan duwang taon na mayong actividades sa ciudad huli kan pandemya.


Alagad an simbahan nakatalaan pang maghaman nin pinal na desisyon sa coordinasyon sa City Hall.


Sa festividad ni Ina an dakulang actividades kan simbahan iyo an traslacion asin fluvial procession na sinusongko nin labi sa on milyon debotos hale pa sa manlaen-laen na ciudades, mga provincia maging hale pa sa ibang nasyon.


Sinabi pa ni Rañola kun panahon kan festividad ni Ina maabot sa 1.5 milyon na bisita, debotos asin turista an nagdadayo sa Ciudad nin Naga na dakulang tabang sa sektor nin negosyante na apektado man kan nakaaging duwang taon na pandemya.


Sa lado kan City Hall kabale sa mga pig-aandaman iyo an pagbuelta kan civic parade, regional military parade, voyadores festival, Miss Bicolandia Beauty Pageant. Si Rañola iyo an chairman kan Beauty Pageant Committee kan mayo pang pandemya alagad depende ki Alcalde Legacion kun ititiwala giraray sa saiya sa 14th Sangguniang Panlungsod.


Si Alcalde Nelson Legacion nagtutubod na mamantenir an status kan ciudad sa alert level 1 sa bulan nin Septiembre 2022 asin dakulang bagay ini na dagos nang makabangon an economiya. (DPAureus)