Naga mangangaipo nin dugang na doctors, nurses

Nagtitiwala si Consejal Sonny Rañola, chairman kan Committee on Health sa Sangguniang Panlungsod na dakul an ma-apply na mga doctor asin nurses sa Ciudad nin Naga oras na maging operational na an bagong edificio kan City Hospital sa brgy. Balatas asin iginilid an isyu sa kakulangan nin mga medical asin health professionals.

Mas pabor sa mga doctor na magtrabajo sa gobierno maging nurses huli ta halangkaw an sueldo kumpara sa ibang pribadong hospital.


Ini sa tahaw kan report na nagkukulang an mga medical health professionals sa mga gobierno hospital huli kan coronavirus disease (Covid-19) mantang an iba mas mawot magtrabajo sa abroad na mas halangkaw an sueldo.


Si Rañola iyo an main author kan ordinansa nganing magpa-konstruhir nin mas mahiwas na hospital mantang nagdadakul na an pasyente na piglalaog sa presenting hayapit na edificio kan City Hospital sa Peñafrancia Avenue.


An bagong ipapatindog na edificio kan hospital sa barangay Balatas igwang 200 bed capacity kumpara sa presenting hospital kan ciudad na igwa sanang veinteng bed capacity.


Si Alcalde Nelson Nelson Legacion nagpahayag na kun igwa nang mas mahiwas na hospital an ciudad makakatabang sa kakulangan nin bed capacity para sa pasyente sa Covid-19.


Cantidad Php350 milyon an pigtagamang fondo kan bagong hospital hale sa Php700 milyon na uutangon kan City Hall sa Development Bank of the Philippines (DBP).


Kabale sa sinambit na fondo para sa mga ekipahes, laboratoryo asin iba pang kagamitan.


Sa presente an City Hall igwa nang Infirmary City Hospital sa Barangay Carolina.


Sinabi ni City Engineer Alexander Caning oras na mag-abot na an inuutang na fondo isusubasta tolos an proyekto sa hospital asin posibleng mangyari ini sa masunod na bulan nganing mapunan na an konstruksyon kan bagong edificio. (dpa)