Naga mautang P700-M
Kinakaipuhan na mag-utang sa bangko nin ginatos na milyon pesos an lokal na gobierno kan Ciudad nin Naga nganing maimplementar an mga proyekto sa infrastraktura kabale na an socialized housing project.
Sa annual budget kan City Hall inaabot na nin P1.4 bilyon mantang an 50 por ciento digdi o P700-M nadalagan sa salary and wages dai pa kabale an ibang operational expenses.
Sa ginibong sesyon regular kan Sangguniang Panlungsod inaprubaran an ordinansa numerado 2021-041 tanganing matostosan nin fondo an mga proyekto base sa seksyon 297 kan Acta Republica No. 7160 o Local Government Code inaprubaran an P700 milyon na uutangon sa Development Bank of the Philippines (DBP).
Si Consejal Salvador del Castillo, Vice Chairman kan Committee on Finance and Appropriation asin City Youth Councilor Sofia Broso iyo an mga padreno kan ordinansa na sinuportaran kan regular na miembros katuwang an mga City Youth Councilors.
Sinabi ni Del Castillo an uutangon na dakulang cantidad babayadan sa laog nin quince (15) taon alagad igwang tolong taon na grace period sa principal.
Sa isyu na posibleng maapektaran an operational expenses kan City Hall mantang magbabayad cada bulan nin maabot sa P38.9-M asin kun sa sarong taon nasa P47-M dai pa kabale si interest na pinapatong kan bangko.
Sa paliwanag ni Consejal Del Castillo, sinabi kaini na dai man maaapektuhan an operational expenses kan ciudad. An punto nin huli ta kukuanon sa 20 percent local development fund an pambayad sa utang asin dadagdagan na lang kan hale sa ibang sources.
BILLIONAIRE CITY
An City Hall naging billionaire city puon kan administrasyon ni dating Alcalde John Bongat piglalaoman kan consejal na kayang bayadan an ginatos na milyon pesos na uutangon sa bangko. Kun sa 15 taon magbabayad an City Hall nin maabot P3.89-M cada bulan asin 4 percent interest per anum alagad aadalan giraray cada ika-limang taon.
Sa administrasyon ni dating alcalde Bongat nakautang sana nin P65-M nganing ibayad sa morosidad sa electric bill kan Casureco II mantang si proyekto sa infrastraktura hale sa lokal na gobierno.
Alagad sabi man kan ibang opisyal kan ciudad dakulang cantidad sa presenteng administrasyon sa dahilan kan mga dakul na proyekto.
Nag-aabot na sa P1.4 bilyon an annual budget kan ciudad asin an 40 por ciento digdi naghahale sa IRA.
Saro sa pigpapangako na kukuanan nin pambayad iyo an an internal revenue allotment (IRA).
Si Alcalde Nelson Legacion tinawan nin ‘‘full power and authority’’ kan SP nganing iyo an magpirma kan gabos na dokumento.
MGA PROYEKTO
An mga prioridad na proyekto kinababalehan kan road construction Magsaysay (NCSHS) - Balatas na may cantidad P50-M; urban redevelopment project – P200-M; konstruksyon kan bagong City Hospital na kumpleto na nin laboratoryo asin diagnostic equipment; asin iba pang pangangaipo sa hospital igwang total na P350-M
Afuera kaini, mabakal nin lote para sa socialized housing project asin iba pang mga development projects sa cantidad na P100-M.
An proyekto sarong socio-economic development projects base sa inaprubaran kan local development plan para sa taon 2021-2022.
Si Consejal Vidal Castillo, Chairman kan Committee on Infrastructure nagpahayag na makakatabang an inuutang na fondo nganing madagos an mga napendiente proyekto sa insfrastraktura huli ta si ibang alokasyon nagdalagan sa fondo sa paglaban sa coronavirus disease.
Sa lado man ni Consejal Sonny Rañola, Chairman kan Committee on Health dakulang bagay an uutangon na fondo nganing marealisar man giraray an saiyang pangiturogan na bagong edificio kan City Hall.
Si Rañola, iyo an padreno kaini resolusyon para sa bagong hospital sa barangay Balatas. (dpa)