Naga naka-andam vs Delta Variant
Naka-alerto an lokal na gobierno kan Ciudad nin Naga laban sa posibleng pag-atake kan tinatakotan na Delta Variant kan Covid-19 sagcod na nagpaluwas nin mga policia nganing estritong sunodon an mga policia puon sa Agosto 15-31 asin pigdesignar an Sta. Cruz National High School Bldg. sa Barangay Sta Cruz bilang iyo an exclusibong quarantine facility kan pasyente na puedeng dudahan caso na kan variant na nagpuon sa India.
Sinda Alcalde Nelson Legacion asin City Health Officer Dr. Vito ‘‘Butch’’ Borja nag-atubang sa press conference nganing ibiklad kun panong aandaman kan City Hall an ano man na pagbungkaras kan delta variant case.
Sinabi ni Borja an maisog na variant madaling makaulakit lalo na sa dai nagsusulot nin face mask sa laog sana nin 15 segundos na agihan kan positivo sa caso tatamaan kan virus.
An importante sa ngunian magduble nin face mask nganing dai maulakitan kan delicadong virus na nagpuon sa India alagad naglalakop na sa ibang mga nasyon.
Sinda Alcalde Nelson Legacion (sa too), City Health Officer Dr. Vito ‘’Butch’’ Borja (sa tahaw) asin Renne Gumba, jefe kan PSO nagpapaliwanag sa press conference kan mga pag-andam kan lokal na gobierno sa homa kan Delta Variant. (dpa)
An Delta Variant nagpuon kan Oktubre 2020 mantang an Alpha asin Beta Variant kan Abril 2021.
An solusyon nganing makalikay sa bagong variant magpabakuna asin dai magparaluwas sa saindang residencia, sabi pa ni Borja.
Sinabi ni Legacion saindang nareparo na perming matawo sa mga plaza asin an aksyon sarahan an tolong mga plaza na kinababalehan kan Plaza Rizal, Quince Martires asin Plaza Quezon.
Dai na tutugotan an mga senior citizens na magruluwas sa saindang residencia kun dai pa bakunado nin duwang veces. Kun nakaduwa nang bakuna papalihison muna an 14 diyas.
Target kan ciudad na dapat 85 por ciento bakunado na an sektor kan senior citizen.
Estrictong iimplementar an curfew hour puon alas 9:00 nin banggui hasta alas 4:00 nin aga asin dapat abot na sanang alas 9:00 nin banggui an mga establisimiento de negosyo.
Mabilog nin sampolong miembros kan sarong team nganing iyo an maglibot sa mga establisimiento de negosyo kun nagsusunod sinda sa mga policia kan City Hall.
Afuera pa kaini, nakatalaan liwat mag-urulay an opisyales lokal sa pinalmenteng pagpanday kan mga policia. (DPAureus)