Naga piglihisan liwat kan suplay nin bakuna

Namumundo an City Hall na nalihisan na naman kan gobierno nasyonal an Ciudad nin Naga makabale sa dapat masuplayan nin dugang na vaccine alagad dinadara naman sa ibang provincia asin ciudad.

Apesar pig-declara na kan national-IATF sa irarum kan Modified Enhanced Community Quarantine (MECQ) puon kasuodmang Hunyo 16 alagad haros pigtitipidan sana kan suplay nin bakuna.

Mas magiging estricto an City Hall sa mga bagong guidelines sa health and safety protocols na dapat ipasunod kan Naga City Police Office, Public Safety Office asin kan opisyales de barangay sagcod na nagdadanay an MECQ sa ciudad.

Sinabi ni Alcalde Nelson Legacion sa miembros kan media apesar na igwa naman nag-abot na dos milyon na doses kan pfizer na pigrecibe kan Department of Health alagad liwat naman nalihisan an ciudad.

Dakulang kahapotan kan jefe ejecutivo kun tano ta apesar aram na kan DOH asin national IATF na nagpaparalangkaw an coronavirus disease cases sa ciudad alagad dai naheheling na dapat tawan nin prioridad.

Kun igwa man nag-aabot na suplay ‘‘padikitdikit’’ sana asin kun tama sana an pigsusuplay sa ciudad dakulang tabang contra sa pagkuriyat kan virus, sabi pa.

Sa rehiyon Bicol an Ciudad nin Naga iyo sana an pigdeclara bilang nasa irarum kan MECQ. Sa datus kan DOH Bicol an Ciudad nin Naga iyo na an na-ngengenotan sa may halangkaw na caso sa virus nalampasan na an Camarines Sur. Sinabi pa na cuarenta por ciento kan Covid case sa Camarines Sur na-ikukurit sa Ciudad nin Naga.

An City Hall maging an Archidiocesis nin Caceres padagos an saindang advocacia na magpatudok nin bakuna contra Covid-19 alagad kulang an pigsusuplay kan gobierno nasyonal.

Limitado sana an enot na pigbagsak na suplay kan Sinovac asin AstraZeneca sa ciudad na pigtawan nin prioridad an mga health workers, fronliners asin senior citizens.

An ibang opisyales lokal na habo na magpasambit kan saindang pangaran nagpahayag na duda sinda an posibleng an dahilan digdi iyo an pulitika mantang aram na taga Naga si Bise Presidente Leni Robredo.

Napag-araman pa na natawan nin prioridad kan pag-abot kan dugang na suplay kan vaccine iyo an provincia kan Davao.

An City Hall na igwang sadiring fondo na cantidad P63 milyon naglalaom kan saindang babakalon na AstraZeneca, alagad dai na madadagos huli ta apektado na kan global demand.

An desisyon kan ciudad maghanap nin ibang pharmaceutical company na nakaulay na an bagong supplier na DistPhil, awtorisadong vaccine distributor kan COVAXIN.

Nag-order na si Legacion nin cincueta mil doses para sa 25 mil katawo nin COVAXIN hale sa Bharat Biotech sa India.

Laen pa kaini, nagpa-reserba nin dugang na 100 mil doses sa kaparejong kumpanya.

An pig-order na Covid-19 vaccine aprubado na para sa Emergency Use Authority kan Food and Drug Administration kan nakaaging Abril 19, 2021 asin piglalaoman na maabot an suplay sa sunod na bulan nin Hulyo 2021. (Danny P. Aureus)