NAGA TATAGHAN LIDER KAN CPP/NPA, SABI: SP, PA, PNP, PB nagtalaan nin closed door meeting

An Sangguniang Panlungsod kan Ciudad nin Naga nagtalaan nin closed door meeting sa mga halangkaw na opisyal kan 9th Infantry Division kan Philippine Army sa Bicol, Naga City Police Office, Punong Barangay kan Concepcion Grande asin DSWD nganing malinawan an isyu sa red tagging asin pagdeclara kan ciudad bilang ‘‘white area’’ o yaon digdi an mga lider kan Communist Party of the Philippine/New People’s Army.


Si Consejal Vidal Castillo, nagpahayag sa Bicol Mail na saindang imbitado sa executive meeting sa Lunes, Hunyo 13 sinda MGen Alex Luna, Commanding General kan 9th Infantry Division sa Bicol na may base sa Camp Elias Angeles, Pili, Camarines Sur, City Director Nelson Pacalso kan Naga City Police Office, Lt. Col. Rommel Labaro, jefe kan Mobile Company kan NCPO, Brgy. Kapitan Michael Oliva kan Concepcion Grande asin DSWD.


An executive meeting pinagkasundoan kan SP, Phil Army asin PNP huli ta sensitivo an isyu, sabi pa ni Castillo.

Magigirumduman sa ginibong sesyon regular kan SP kan Mayo 24, 2022 naging mainit an isyu sa red tagging asin pagdeclara sa Naga bilang white area sa CPP/NPA sa tahaw kan pagpahimotik ni Lt. Col Labaro na mayo sindang ginigibong red tagging sa mga lider kan progresibong grupo sa Sitio Balatungan, Concepcion Grande alagad dai uyon digdi an nagkaperang miembros kan SP huli ta kumplekado an mga pahayag ni Labaro sa mga ginigibo nindang aksyon inderektang red tagging sa nagkaperang residentes kan Sitio Balatongan na nagkakatarakot an mga nag-eestar digdi.


Sinabi ni Castillo kun totoo may mga lider o NPA sa Sitio Balatungan ano ta dai dinadakop.


Sa ngunian yaon pa an presencia kan NCPO asin Philippine Army sa sinambit na Sitio huli ta nagtatabang sinda sa lugar mala ngani nagbugtak pa nin comfort room.


Alagad natutuyawan an saindang presencia na nagkakaigwa lugod nin pagkatakot an residentes. Kun totoo nagtatabang an mga awtoridad alagad dapat mation ninda an pagkatakot kan mga tawo. ‘‘Dahil envez ma-secure sinda mas lalong natatakot, iyan pagmate kan mga tawo sa sitio’’, sabi ni Consejal Elmer Baldemoro. Maging si Consejal Greg Abonal tinuyaw an PNP huli ta nagpapahimotik na mayong red tagging alagad risahon an inderektang ginigibong red tagging.


ISYU SA WHITE AREA


An bilog na Ciudad nin Naga pigdeclara na white area kan CPP/NPA. boot sabihon ni Labaro na yaon digdi an mga lider, mga nagtataong ‘‘resources, logistical support’’ alagad mayong nangyayaring ralaban kan NPA, PNP maging PA envez presencia kan mga lider, sabi pa.


An itaas na barangay na kinababalihan kan Pacol, Carolina, Panicuason asin Cararayan pigdeclara man komo ‘‘threaten area’’ kan NPA.


Piglinaw pa ni Labaro an National Intelligence Coordinating Committee iyo an nagdeclara na an bilog na Naga ‘‘white area’’ kan CPP/NPA.


ISYU SA RED TAGGING


Si City Youth Councilor Buena iyo an padreno kan propuestong resolusyon na dapat kundenaron an Philippine Army, PNP asin Brgy Kapitan kan Concepcion Grande huli kan ginigibong red tagging sa mga jovenes maging si nag-iba sana sa protest rally, orog na si nagkaperang miembros kan progresibong grupo na natatakot na.


Biktima sinda nin harassment asin fake news, sabi pa.


Alagad dai muna pinasar an resolusyon kan SP asin City Youth Councilors nganing makua ngona an lado kan mga inaakusaran.


Sinabi man ni City Youth Councilor Shane Bea Brazil ‘‘we are not against the police, we area against the red tagging’’. An pagiging aktibista bakong terorismo’’. So we are hopping sana ma-prove talaga. (DPAureus)