Naga Vax, ibababa na sa mga barangay

Irarani na sa mga barangay kan Ciudad nin Naga an Vaccination Express na masikad ngunian na Juevez, Septiembre 30 sa Don Bosco Covered Court sa brgy. Carolina nganing maparikas an barakunahan laban sa coronavirus disease na apektado kan virus an veinte siete barangay kan ciudad.

Si Consejal Sonny Rañola, chairman kan Committee on Health sa Sangguniang Panlungsod nagpahayag kaini sa tahaw kan naglalangkaw na caso kan Covid-19 sa ciudad asin iyo an kinahamanan sa urulay kan Health Emergency Response Task Force (HERTF) na pinamamayohan ni City Health Office Dr. Butch Borja.

An brgy vaccination express target an 300 na residentes cada barangay alagad gigibohon ini na may pag-ultanan nin sarong aldaw sa barangay na mapuon alas 8:00 nin aga hasta alas 2:00 nin hapon, alagad kaipuhan magpalista sa Brgy. Hall.

Mapuon sa itaas na barangay pababa asin dagos-dagos na ini depende sa nag-aabot na suplay kan vaccines hale sa Department of Health Bicol, sabi pa ni Rañola.

Gabos na kategoriya kabale na nag-eedad nin 18 anyos pataas mantang dai na tutugotan an walk-in vaccinees. Igwa nang ginibong koordinasyon an HERTF sa mga barangay nganing pag-andamam an maghapon na vaccinations.

Nangapudan si Consejal Rañola sa barangay na magkooperar sa tahaw kan naglalangkaw na caso kan Covid-19 sa ciudad asin nganing malabanan an virus magpabakuna sa saindang barangay.

Sunod-sunod na an mga pagbakuna mantang igwang maabot na 40,000 na suplay nin vaccines hale sa DOH.

Sa pinakahuring datus kan CEPPIO puon kan vaccination sa ciudad hasta kan Septiembre 25, 2021 igwa nang nabakunahan sa 1st dose – 41,808 mantang sa 2nd dose – 38,332 asin igwa nang total na 80,140 sa 209,000 na populasyon kan ciudad. (DPAureus)