Nagkagaradan na pato hinilo bako sa virus sa hayop - DA

Pinara na kan opisina rehiyonal kan Departamento de Agricultura sa Bicol an pagtubod na posibleng tinamaan kan helang na bird flu an mga nagkagaradan na ataman na pato sa barangay San Isidro, Pamplona, Camarines Sur.

Alagad sa inisyal na inbestigasyon kan Veterinary Office kan DA Bicol bakong huli sa avian influenza envez tuyong hinilo an mga ataman na pato ni Barangay Kapitan Dennis Tarusanan kan Brgy. San Isidro.

Ini an piglinaw ni Emily Bordado, regional information officer kan DA matapos magresponde tolos an saindang veterinary officer sa Barangay San Isidro nganing aramon an insidente.

Sa inbestigasyon igwang manokan an barangay kapitan alagad dai man nakadamay kun nagadan sa virus an pato. Huli kaini, mismo an kagsadiri kan hayop nagtutubod na tuyong hinilo an saiyang atamang na mga pato.

An DA nagdeclara na mayo nang caso kan bird flu sa Camarines Sur matapos enot nang nagkulpa tolos si pagbutwa kan virus sa hayop sa Sipocot asin Bula parejong sa Camarines Sur.

An mga vet officer sa LGUs padagos man giraray kan saindang surveillance asin monitoring sa posibleng maapektaran an mga poultry products sa mga ciudad asin provincia.

An pag-alerto sa sainda nganing dai na makalaog sa saindang lugar an sinambit na virus nganing maagapan asin dai na magkalat.

An bird flu sarong highly contagious viral disease na kun haen an mga tinatamaan iyo an mga domestic poultry animals siring kan mga wild birds asin posibleng carrier kaini an mga migratory birds.

Alertado na an mga vet officers sa LGUs sa Kabikolan matapos mawara naman si caso sa African swine fever sa mga ataman na orig.

Nangapodan liwat an DA Bicol na dapat maging alerto an mga nag-aataman nin pato maging sa mga industriya nin poultry na dai maging pabaya mag-report tolos sa mga vet officers. (dpa)