Nagkapera nang COPs inokag kan PPO CamSur

Nagkapera nang mga jefe kan Municipal Police Stations (MPS) sa Camarines Sur an pigponan nang okagon kan PNP Provincial Office (PPO) huli kan kahagadan kan ibang alcalde lalo na si bagong nagtukaw sa pwesto kan Hulyo 1, 2025.

Igua nang naenot iyo an mga MPS kan Magarao, Gainza, San Jose alagad nagdestino nin dugang na miembros kan PNP sa Iriga City Police Station, sabi ni P/Col. Virgilio Olalia Jr., Provincial Director kan PPO sa CamSur. Igua pang ibang masunod na depende sa kahagan kan alcalde.

An nadedestinong bagong jefe de pulisya mga OIC COP ngona mantang an tamang proceso kaipuhan magsumiter nin limang mga pangaran nin opisyal kan pulis sa opisina kan alcalde asin digdi sinda napili kan isasangling bagong jefe de pulisya.

Afuera pa kaini, segun pa sa provincial director sainda nang pigponan an directiva kan higher command para sa simulation exercise (SIMEX) asin ‘‘communication (COMMEX) on five minutes response time strategy’’.

An mga MPS nag-asegurar sa PPO na kaya ninda an cinco minutos nganing makaresponde tolos sa ano man na nangyayaring insidente o krimen sa sarong lugar.

Mientras tanto, sa Naga City Police Office nagseguro kan limang minutos na dapat makaresponde mantang igua sanang 27 barangay an ciudad. An Naga consideradong matuninong na lugar kun igua man mga insidente mga menor sanang caso siring kan physical injuries asin kadakle kan report sa blotter mga insidente sa trafico. An saro sa saindang higot na kampanya iyo an pagdakop laban sa mga envuelto sa ilegal na droga.