Nagpalyar makasumiter nin SOCE, salbado sa penalidad

An Commission on Election (Comelec) apesar kan saindang mga patanid sa mga nagcandidato kan nakaaging Barangay, Sanggunian Kabataan Elections (BSKE) na dapat magsumiter kan saindang Statement of Contributions and Expenditures (SOCE) hasta kan Noviembre 29 alagad piglinaw na si mga nagpalyar maka-file kan SOCE libredo sa ano man na penalidad.

Si Abogado Maico Julia Jr. Election Officer kan Ciudad nin Naga nagpahayag na igwang total na 233 na mga nagkadaraog na candidato sa Sanggunian Kabataan asin Barangay an nagpalyar makasumiter kan SOCE sa pigtalaan na plaso kan komisyon hasta kan Noviembre 29, 2023.

Alagad saiyang sinabi na base sa Acta Republica 7166 aplicable sana an ley sa mga nagcandidato nasyonal asin lokal na igwang penalidad na P6,000 hasta P30,000 asin discalificado pang magcandidato sa ano man na pwesto elihido. Dai kaayon digdi si mga nagcandidato sa SK asin Barangay.

Dahilan kaini, si 233 na nagsinutil magsumiter kan saindang SOCE sa Comelec kan Ciudad nin Naga dai naghahadit na maatubang sinda nin caso o penalidad huli ta dai sinda kabali sa RA 7166.

Kan nakaaging BSKE igwang total na 1,183 nagsangat kan saindang certifico de candidatura alagad an nakasumiter sana kan SOCE iyo an 950 mga nangganang candidato.

Base sa record kan Comelec Naga gabos na mga nanggana nakasumiter kan saindang SOCE mientras kun dai sinda nagsunod dai makakatukaw sa posisyon.

Mientras tanto, kan Noviembre 29, 2023 iyo naman an pagtapos kan election period asin huli kaini mayo nang maheheling na mga Comelec check point asin paso na an Comelec gun ban.