Nagpapaaram an “Dateline Seattle”

Ini an ultimo kong artikulo sa Bicol Mail. Sa katapusan kaining bulan na Hulyo, magpapaaram na an kolum kong “Dateline Seattle” pakaagi nin haros 15 taon.

Nabigla ako kan makaresibi ako nin email hali ki Nilo Aureus kan nakaaging Sabado, Hulyo 23, 2022. Si Aureus an taga-publikar (publisher) kan Bicol Mail. Sa nasabing email, personal niang ipinaabot sakuya an balita na ipupundo na an publikasyon kan Bicol Mail sa katapusan kaining presenteng bulan.

Segun sa email ni Aureus, “But as much as we want to continue publishing Bicol Mail, there are unavoidable situations that compelled us to decide to fold up our publication.”

Dagdag pa nya, “Thus, it is with a heavy heart that we inform you that the Bicol Mail issue on July 28, 2022 will be our last and final edition, ending officially its 19 years of serving Bicolandia and its people.”

Sa buot ko, mayo man akong magiginibo kun ini an desisyon kan Bicol Mail. Naiintindihan kong marhay an arog kaining desisyon lalo na ngunian na online na an mga bareta. Sa enterong kinaban gulping mga periodiko an saro-saro ng nawawara sa sirkulasyon base sa manlain-lain na rason.

Apuera sa pagkabigla ko, namundo asin nasayangan ako ta mawawaran an mga Bikolano nin sarong periodiko na nagtatao nin mga obhetibong (objective) bareta asin importanteng impormasyon na nakakatabang sainda na makapagdesisyon kun ano an tama o sala sa saindang mga nadadangog, nababasa o nahihiling sa TV.

Hinapot ko sa Messenger an sarong beteranong kolumnista asin komentador sa radyo saka sa TV kun may aram siang progresibong periodiko sa Naga na pwedeng ikumpara sa Bicol Mail. An simbag nya: “Mayo so far.”

Sa opinyon ko, an mga editoryal sa Bicol Mail manunungod sa sosyal, pang-ekonomiya asin politikal na mga isyus, mag lokal man o nasyonal, nagpapatotoo na an Bicol Mail mayong pinapaboran.

Ini para sakuya an nakakamundo sa pagsera kan Bicol Mail lalo na ngunian na lakop an “fake news” sa manlain-lain na plataporma nin midya sosyal arog kan Facebook, Twitter, TikTok asin iba pa.

Poon pa kan 1953 kan imukna an Bicol Mail kan parasurat asin enot na mayor kan Naga City na si Leon Sa. Aureus, mayong kuestion na halangkaw an kredebilidad kan periodiko sa enterong rehiyon. Dai kaini takot ipublikar an sala, kun sala; dai takot sabihon an tama, kun tama. Sa simpleng tataramon, mayong kinatatakotan. Kaya ngani kan ideklara an Martial Law kan diktador na si Ferdinand Marcos, saro an Bicol Mail sa mga ipinasarang periodiko kan gobyerno.

Treinta y uno anyos an nakaagi matapos ipasara an Bicol Mail kan 1972 bago uli ini natawan nin bagong buhay kan pigrevived an periodiko ni Nilo Aureus kan 2003.

Kan inimbitaran ako kan amigo asin kaklase kong si Ernie Verdadero aka: “Mr. Ini an Totoo” na magsurat sa Bicol Mail, siguro mga 15 anyos na an nakaagi, dai ako nagalangan na akoon an saiyang imbitasyon. Aram kong marhay an reputasyon kan Bicol Mail.

Aram ko na ipapadagos kan “Bicol Mail 2003” an pilosopiya asin direksion kan “Bicol Mail 1953” na magin numero unong depender (defender) kan “press freedom,” na saro sa mga harigi para magkaigwa nin tunay na demokrasya.

Dai ako nasala sa sakuyang desisyon na magin kolumnista sa Bicol Mail sa laog nin haros 15 anyos. Na-tsalens ako pero nagtao nin personal na kaugmahan sakuya an magin parte kan Bicol Mail sa halawig na panahon.

Gusto kong magpasalamat sa Bicol Mail, lalo na ki Nilo Aureus, sa oportunidad na itinao nia sakuya na makapag contribute kan kadikit kong naaaraman asin kaisipan manunungod sa mga bagay-bagay sa paagi kan sakuyang kolum na “Dateline Seattle.”

Gusto ko man magpasalamat sa mga nagtao sakuya nin feedback kan mga nakaaging perang taon na nagpakusog asin nagtao sakuya nin inspirasyon na ipadagos an sakuyang pagsurat.

Mabalos man sa enterong staff kan Bicol Mail na, sa totoo lang, kun mayo sinda, mayong Bicol Mail.

Sa katapusan kan ano man na bagay na importante sa buhay kan tawo, dai maiibitaran na may kamunduan. Pero sabi ngani ni Henry Wadsworth Longfellow, an pamusong edukador asin pararawitdawit na Amerikano, “Great is the art of beginning, but greater is the art of ending.”