Nagpugot nin payo sa sarong lola kinasohan na sa fiscalia

Lupi, Camarines Sur --- Nag-aatubang nang casong panggadan sa fiscalia an suspek na nagpugot nin payo sa sarong lola sa Zona 3, Barangay San Ramon sa banwaan na ini mga alas 11:20 nin aga kan Oktubre 8, 2026.

An suspek na 25 anyos na nginaranan kan mga awtoridad na ‘‘Gustong’’ yaon na sa custodia kan Municipal Police Station mantang an biktimang si lola, 66 anyos parehong nag-eestar sa sinambit na barangay asin magkataid sanang residencia.

Sa imbestigasyon kan MPS naheling kan sarong testigo na nginaranan na si Mando an suspek na may bitbit nin sundang namay tinaga sa kataid sana nindang residencia asin naheling na mayo nang buhay an biktima matapos pugotan nin payo.

Naghagad tolos nin tabang an testigo sa barangay asin nahulog man sana sa kamot ni barangay Kapitan Wilma Recuerdo na dagos nang inarestar kan mga awtoridad.

Dai maaraman kan mga awtoridad an motibo alagad sinasabi na igwang deferencia sa pag-iisip an suspek alagad an report sa barangay envuelto sa droga an suspek. An ginamit na sundang nakua na nakatadok sa poon nin limonsito harani sa saindang residencia.