NAGSINUTIL MAGPA-CONSOLIDATE: Show cause order aksyon kan LTFRB vs operator nin jeepney

An Land Transportation Franchising and Regulatory Board (LTFRB) sa Bicol nakatalaan nang magpadara nin ‘‘show cause order’’ ngunian na semana sa mga jeepney na nagsinutil magpa-consolidate matapos kan quince diyas na extension kan ahencia.

Matapos kan plaso sa consolidation kan Abril 30, 2024 sa pag-implementar sa jeepney phaseout, sinabi ni LTFRB Regional Director Joel Defeo maabot na sana sa 140 jeepney an nagsinutil an saindang mga operator sa pigmamando kan gobierno.

An iba sa mga unconsolidated jeepney patagong nagkakayog nganing isumpay sa saindang hanap buhay sa familia alagad an ley nagsusugo na dapat sinda dakopon huli ta considerado nang kolurom o cancelado na an franquicia, sabi pa kan LTFRB.

Sa datus nasa 94 por ciento kan mga pasajerong jeepney sa Bicol nagpa-consolidate na an saindang mga operators.

An show cause order parte kan proceso kan ahencia nganing hagadan nin paliwanag sagcod na dagos nang hubaan nin franquicia.

Alagad an paliwanag kan ibang mga operator na saindang sinasayumahan an pagpa-consolidate huli kan inaabot nin dos milyon pesos an gastos kaya dai sinda nagbale sa grupo kan modernize jeepneys.

An programa kan gobierno sa jeepney modernization panahon pa sa administrasyon ni dating Presidente Rodrigo Duterte alagad perang taon pig-uktaba sagcod na nagging estricto sa ‘‘no extension’’ an bagong administrasyon ni Presidente Ferdinand Marcos.

Sa Naga City Police Office, si City Director P/Col. Erwin Rebellion nagpahayag na preparado an saindang personaje kun kinakaipuhan magkadarakop na an mga kolorum na jeepney matapos magpalyar magpa-consolidate.

Halat ninda an coordinasyon kan LTFRB mantang igwa na sindang ginigibong one-time-big-time laban sa mga traffic violators.