Nagsurokong CTG sa Bicol marecibe nin biyaya-9th ID

Camp Elias Angeles, Pili, CamSur --- An 9th Infantry Division kan Philippine Army sa Bicol nasa proceso kan mga dokumento nganing marecibe an mga biyaya para makabalik sa normal na pagbuhay an bagong batch naman kan mga nagsurukong 49 miembros asin suportadores kan Communist Terrorist Group (CTG) hale sa provincia nin Masbate.


Si Army Major John Paul Belleza, opisyal na parataram kan 9th ID kan Philippine Army sa Bicol nagpahayag kabale sa mga calificadong mga rebel returnees an makakarecibe kan minasunod, automatic financial assistance hale sa lokal na gobierno na nagcacantidad P15,000; biyaya hale sa Enhanced Comprehensive Integration Program kan gobierno nasyonal; pigsukong armas depende sa calibre an cantidad asin iba pa para sa saindang pagbalik sa normal na pagbuhay.


Alagad piglinaw ni Major Belleza an mga calificado sa mga makakarecibe nin biyaya iyo an Milisyang Bayan, Sangay ng Partido sa Lokalidad asin mga regular na miembros kan rebeldeng New People’s Army.


An 49 pinakahuring grupo nin mga nagsuruko sa Masbate kinababalehan kan mga suportadores kan CTG na kumpuesto nin pitong regular na miembros kan NPA, apat hale sa Milisyang Bayan asin 36 mga suportadores.

Manlaen-laen na calibreng armas pigsuko kan mga rebeldeng NPA hale sa Masbate sa 9th ID sa pamamayo ni MGen Henry A. Robinson Jr. PA, Commander of Joint Task Force Bicolandia. (9th ID)


Saindang sinuko an 57 manlaen-laen na klasing armas na igwang high powered asin 56 low firearms. Afuera pa kaini, saindang sinuko an sarong anti-tank asin anti-personnel mine, mga magazine kan kumunista asin mga bala.


An returnees pig-welcomed kan mga opisyal kan militar kan Sabado, Noviembre 6 sa headquarters kan 2nd Infantry Battalion sa Brgy. Bacolod, Milagros, Masbate.


Si MGen Henry Robinson Jr. PA, Commander kan Joint Task Force Bicolandia inomaw an pagtarabangan kan security sector, LGUs ahencias de gobierno asin namamanuan na padagos nang nagdedenuncia sa CTG.


Envuelto digdi an mga elementos kan 903rd Infantry Brigade, 2nd IB, 22nd IB, 31st IB, 96th IB, 91st Division Reconnaissance Company, Masbate 2nd Provincial Mobile Force Company asin mga Intelligence units sa espuersos man nganing magsuroko an grupo sa paagi ni Lt. Col. Siegfried Felipe Awichenc, Battalion Commander kan 2nd IB asin yaon man si Col. Aldwine Almase, Brigade Commander kan 903rd Brigade.


Nagpasalamat man si BGen Robinson sa mga rebel returnees huli ta katuwang na kan gobierno sa paglaban sa CTG.


Sinabi pa ngunian sanang taon igwa nang 1,100 na mga nagsuroko.