Nagtapos na Festividad ni Ina, matuninong - NCPO

Sa higot na seguridad sa pagmantenir kan paz y orden sa nagtapos na Traslacion asin Fluvial procession ki Nuestra Señora de Peñafrancia maging mga actividades civico kan City Hall naging matuninong an ciudad sa nagtapos na festividad ni Ina.

An Naga City Police Office (NCPO) sa pamamayo ni City Director P/Col. Nestor Pacalso katuwang an augmentation force hali sa PRO 5 asin mga soldados kan 9th Infantry Division kan Philippine Army nangyari na heneramente matuninong si paz y orden huli sa didikasyon sa trabajo sa tahaw kan maabot sa 900 mil na devotos an mga nagparticipar sa Traslacion procession kan Septiembre 8 asin 1.3 milyon sa ginibong fluvial procession kan Septiembre 16 nganing maseguro an seguridad kan pagpuli kan imahen ni Ina sa Peñafrancia Basilica Minore hali sa Naga Metropolitan Cathedral.

Igwa sindang pigwarak na kapupulisan sa pagmantenir kan trafico sa tahaw kan hibog kan motorista palaog asin paluwas sa ciudad sagcod nagtapos an kafiestahan ni Ina.

Kasunod kan nagtapos na celebrasyon sa kafiestahan ni Ina, si Col. Pacalso nagsabi an sainda naman pigtutukan iyo an apat na aldaw na 2023 Bar Examinations sa University of Nueva Caceres.

Ini nganing maseguro an trafico asin ‘‘safety and security of the examinees,’’ sabi pa kan City Director.

An simbahan asin City Hall nagpasalamat man sa NCPO sa pagtao nin higot na seguridad sa ribo-ribong bisita.