Nalalapang basura sa Sanitary Landfill gigibohon abuno

Mapapakinabangan na kan paraoma an nalalapang basura oras na magproducer na nin organikong abuno an Material Recovery Facilities (MRF) hali sa basura sa Sanitary Landfill sa Barangay San Isidro, Ciudad nin Naga.

Liwat ginagamit kan Solid Waste Management Office (SWMO) kan City Hall an Residual Contentment Area (RCA) sa Sanitary Landfill sa katuyohan na isuhay an nalalapa asin dai nalalapang basura.

An MRF naging operational sa dating Balatas Dump Site na nagkukumbertir sa organikong abuno kan nalalapang basura alagad loma na pinahirahayan kan SWMO na naggastos nin P450,000 kumpara sa mabakal nin bagong ekipahes na kinakarkulong P50-M hasta P75-M.

Ini an mga pahayag sa Bicol Mail ni Engr. Joel Martin, jefe kan SWMO kasunod kan pag-usar na kan ciudad kan MRT poon kan nakaaging semana na igwang capacidad nin cinco hasta otso tonelada cada oras.

Katuyohan kan pagbugtak kaini huli ta mandato kan Acta Republica 9003 o mas midbid sa Ecological Solid Waste Management Act of 2000 na sinusogo kan DENR an gabos na LGUs na dapat gabos na basura naagi sa MRF.

An organic fertilizer maluwas sa paagi kan biomas deretso na sa composter drums and composting bins, sabi pa ni Engr. Martin.

Tanganing mapakarhay an tamang waste management asin disposal sa Naga an SWMO nagpaapod nin Seminar on Waste Data Gathering and Analysis na pigparticiparan kan opisyales kan 27 barangay kan ciudad na ginibo kan Marso 22, 2024 sa PAGCOR Multipurpose Evacuation Center, Barangay Balatas.

Sinabi pa kan SWMO, pig-urulayan an tamang mga paagi mapadapit sa pagsuhay kan nalalapa asin dai nalalapang basura asin dapat igwang participasyon digdi an publico.