top of page

NAMEMELIGRONG DAGOS NANG HALION: MNWD GM Luansing sinuspinde

Matapos kan tolong taon nang nalulugi alagad mayong naginibong solusyon si Engr. Virgilio Luansing bilang general manager kan Metropolitan Naga Water District (MNWD), an Board of Directors (BOD) nagdesisyon na sampalingon nin pitong aldaw na preventive suspension si Luansing huli sa ‘‘loss of confidence’’ epektibo kan Marso 7.


Sa press conference kan Marso 8 sa opisina kan MNWD na pinangenotan ni Board Chairman Gilbert Albero kaibanan niya an apat na directors tinatawan nin 48 oras kan junta puon na marecibe an board resolution No. 11 series of 2022 nganing magsumiter kan saiyang lado asin paliwanag kun tano ta dai dapat siya kastigohon sagcod na sipaon sa serbisyo sa MNWD.


Magabat an mga isyu asin sisimbagon kan general manager base sa ‘‘joint resolution’’ kan junta na pinamamayohan ni Chairman Gilbert Albero kabale sa mga nakapirma an Vice Chairman Monina Lily Claveria, Secretary kan BOD; Marelissa Ampuan, Engr. Emeterio Aman asin Agileo Michael Pauig.


Sinabi pa sa resolusyon na igwang kaluyahan o ‘‘mismanagement’’ sa pagpadalagan kan MNWD si Luansing inabot nin tolong taon an net losses, puon kan 2019, 2020 asin 2021 mayong pinaheling na aksyon.

Si Board Chairman Gilbert Albero (sa tahaw) kan MNWD nag-atubang sa press conference sa Ciudad nin Naga nganing kumfirmaron an resolusyon kan junta sa pitong aldaw na preventive suspension contra ki GM Virgilio Launsing. Kaibanan an iba pang miembros kan junta sinda (hale sa wala sundo sa too) Engr. Emeterio Aman, Marilissa Ampuan, Monina Lily Claveria asin Agileo Michael Pauig. (DPA)



Hababa an revenue, loss of income huli ta dakula si ‘‘operational expenses contra sa revenue and poor productivity’’. Sinabi pa na nagpadagos an maluyang performance na resulta kaini kan Enero 2022 nagkaigwa sana sinda nin P1.5 milyon na net income asin nagpalyar iimplementar si water rate increase na naging kontribusyon pa sa dakulang pagkakalugi.


Dai nareresolber si mga reclamo sa maluyang suplay nin tubig sa Mabulo, Ciudad nin Naga; Gainza, Camaligan, Canaman asin Magarao apesar kan saiyang mga pahayag sa junta kan Febrero 18, 2022 na mayong nangyayaring water shortage sa sinambit na mga lugar.


Nagbakal nin milyones peso na cantidad nin lote sa Sitio Pagdahicon, Mabulo para sa Bicol River Water Surface Treatment Plant Project alagad mayo man nin maninigong fondo.


Dai pa nakuntento nagbakal pa nin sarong hektaryang lote na milyones peso an cantidad sa barangay Balatas para sa propuestong expansion sa opisina kan MNWD alagad an problema sa water district dai natawan solusyon asin si mga obligasyon para sa biyaya kan mga opisyales asin empleados dai na naitatao an dahilan padagos na pagkalugi, sabi pa sa resolusyon.


Si Luansing dai makuanan nin lado kan media mantang dai naman nag-atendir sa press conference asin dialogue sa mga empleados. (DPAureus)


Comments


bottom of page