Nangingikil na PMaj dakop sa kampo kan PNP Bicol

Nabigla an mga opisyales kan Philippine National Police sa Camp BGen Simeon Ola sa Ciudad nin Legazpi matapos madakop sa entrapment operation an sarong police major na nagngingikil nin kabayaran nganing macierto na makapasar sa medical examination sa nagpapadagos na proceso sa pagkalap nin miembros kan PNP sa PRO5.

Sinabi ni Lt. Col. Malu Calubaquib, opisyal na parataram kan PNP Bicol nabigla sinda kan insidente alagad dai sinda matolerar nganing mag-atubang nin disciplinary action asin kriminal.

Base sa intelligence reports an opisyales kan PNP nagkaigua nin surveillance operations, na pigkunducir kan PRO 5 operatives sa entrapment operation kan Hunyo 18, 2026, mga bandang alas 10:45 nin aga sa laog kan Camp BGen Simeon Ola.

An operasyon pigtarabangan kan regional intelligence unit 5, tracker team na iyo an nangenotan sa operasyon asin Legazpi City Police Station. Nagresulta sa pagkaka-arestar sa police major matapos mangikil nin P38,00 nganing maseguro na pasado sa medical examination sa pagkalap nin bagong miembros kan pulisya.

An liderato ni PBGen Erosito Miranda, Regional Director, an operasyon parte kan saindang cleansing program laban sa ano man na kurapsyon, pag-abuso sa poder asin ilegal na actividades.

An suspek na 40 anyos na opisyal kan PNP destino sa Regional Medical Unit 5, residente kan San Fernando City, La Union, na inarestar asin pinaliwanagan kan saiyang deretso nganing masabotan an casong aatubangon asin dinara sa Legazpi City Hospital para sa physical asin mental examination asin dinara sa Legazpi City Police Station para sa saindang disposiyon kan caso.