NANGYARI SA WOMEN’S MONTH: Suspek sa sexual harassmentsa MNWD iniimbestigaran na

Isusunad sa imbestigasyon kan Metropolitan Naga Water District (MNWD) an saro sa mga division manager na pigrereclamong sexual harassment kan sarong nag-OJT estudiante kan Partido State University (PSU) na premirong insidente sa manijamiento kan water district sa tahaw kan Women’s Month celebration ngunian na bulan.

An PSU nagsurat na sa Women’s Desk kan Naga City Police Office nganing imbestigaran an reclamo asin makasohan an suspek.

Kinumfirmar sa Bicol Mail ni General Manager Florencio Mongoso Jr. an inbestigasyon dapat ipadagos kan investigation committee na papangenotan kan HR Chief Sherry Peñas, Assistant General Manager Roque Francisco asin Administrative and Finance AGM Emma Cuyo asin kaipuhan taposon sa lalong madaling panahon.

An directiva kan GM sa inbestigasyon ipadagos dawa mayong opisyal na reclamo nganing mag-atubang nin disciplinary action kun totoo an sombong na nagluwas man sa ibang estasyon nin radyo.

An suspek na veinte anyos na sa serbisyo kan MNWD dai pa pigluluwas kan manijamiento an pangaran napiritan na magbakasyon sa trabajo.

Apat na mga estudianteng babae kan PSU Tinambac Campus an tinugotan kan MNWD na mag-OJT sa kahagadan kan Universidad.

Kan nakatapos kan 200 hours na requirement kan Universidad, kan Marso 6, 2024 an mga estudiante nagkua kan saindang certificate of completion. An saro sa daragang estudiante soboot pinalunad sa pribadong vehiculo kan pigrereclamong division manager sagcod na dinara sa sarong drive-in sa Almeda, San Felipe, Ciudad nin Naga alagad an daraga natakot asin napiritan na magdalagan padulag.

Nagsombong tolos sa opisina kan HR na naghihibi mientras na nag-eestorya kan nangyaring sexual harassment.

An estudiante nagsombong na sa sarong opisyal kan PSU nganing aksyonan sagcod pinaabot na sa MNWD an reclamo.

Sinabi man ni Choppy Dela Cruz, opisyal na parataram kan water district an imbestigasyon pig-iniciar kan manijamiento tanganing matawan justicia an biktima.

Kasusupgan an nangyaring ini sa pangaran kan water district kaya nganing nag-iimbestigar na an pigcrear na komite mantang dai matolerar an manijamiento, sabi pa. (dpa)