‘‘Nanlaban’’ sa drug operations papainbestigaran sa NBI, CHR

Ciudad nin Iriga --- Piglubong na kan Lunes, Abril 12 si Punong Barangay Elmer Casabuena kan Brgy. Niño Jesus na pigsasabi sa report kan Iriga City Police Station na ‘‘nanlaban’’ sa drug operation alagad nagtutubod si Alcalde Madel Alfelor na pulitika an motibo asin dapat matawan justicia an biktima mientras na cuestionable an operasyon kan PNP.

An familia asin an jefe ejecutivo matabangan nganing ma-inbestigaran an caso kan National Bureau of Investigation asin Commission on Human Rights nin huli ta maninigo sanang matawan nin justicia na bakong makatawo an pag-gadan sa biktima mantang an reclamo kan familia na nagkukurahaw sa atubangan kan mga awtoridad na dai siya gadanon envez sunod-sunod an putok nin badil sa laog kan residencia.

Apesar na mayong kalaban-laban napapalibot an nin armadong kapupulisan asin sa laog kan residencia panong magsahot na ‘‘naglaban’’ an punong barangay, sabi pa ni Alfelor.

Pigcucuestion kan jefe ejecutivo si ginibong search operations kan mga pulis tano ta ginibo ala 1:00 nin maagahon na puede man sanang aga mantang mayo ngani si mga mandatory witness na pigmamanado kan ley sa pagconducir nin drug operations.

Inapodan sana si mga dapat na testigos na hale sa media asin opisyal kan barangay alas 3:00 nin aga tapos na an operasyon asin gadan na an biktima.

Igwa nang affidavit an opisyal kan barangay asin hale sa media na inapodan sana sinda alas 3:00 na nin maagahon tapos na an gabos na mga proceso sa drug operations asin binawian na nin buhay an punong barangay.

An mga nakumfiscar sa drug operation dai na pig-inbentaryo sa residencia sa presencia kan mga testigos envez pinatos na sana kan mga awtoridad kabale an mga cuarta nganing sa Police Station na gibohon.

Kabale sa nakumfiscar iyo an soboot badil kan punong barangay.

An familia kan kapitan nagpahayag na an cuarta bako sa ilegal na droga alagad sa koleksyon hale sa mga bayad kan parukyano mantang an biktima sarong distributor nin farm input.

An barangay Niño Jesus, declarado kan PNP bilang saro nang ‘‘drug cleared barangay’’. (dpa)