Nasaan Ka Irog Ko

Tunay na maribong sa payo ang ika magpara imahenar nin sarong babae na solamente sa surat mo sana nahihiling asin nungka mong namansayan ang alimpoporo kan babaing ini na huna mo sarong “ghost project”. Si Sonny, sarong mestisong Atenista, tunay na guapo, maskulado asin desinte sa uniporme kan Ateneo de Naga. Si Sonny saro sa mga aki kan mag agom na tubong Batangas alagad naka abot sa kabikolan durante kan WW2 asin nagka iguang mahiwas na kadagaan sa Paolbo asin Santa Cruz sa banwaan nin Calabanga. Ngonian na nagdadangadang na sa edad na 70, dai pa nanggad nalilingawan ni Sonny si Sweet Lovely Rose, ang alyas nin sarong babae na haros kada simana, nagpapadara saiya nin surat sa paagi nin Koreo na nag sasabing, in love siya ki Sonny. Magayon an surat kamot ni Sweet Lovely Rose, asin magayon an papel na stationery na igua pang tatak kan Boning’s Trading na iyo an pinaka dakulang bakalan nin mga office asin school supplies sa kalye Heneral Luna sa tongod kan Supermarket.

Dara kan magayon na mga tataramon nin pagkamoot ni Sweet Lovely Rose, asin magayon siyang magsurat nin English na siguradong pag tutubudan na siya sarong Colehiala, nagtadom sa hotok ni Sonny ang pagmati asin desisyon na gusto niyang mahiling sa persona an babae asin gibohon na elusion sagkod na ini saiyang pakasalan sa Cathedral ni Monsignor Nicanor Belleza. Haros aro-aldao kung mayo nin klase sa Ateneo, sinasangkayan ni Sonny an saiyang “fuji” tangani sanang maglibot libot sa mga kalye harani sa saindang harong sa P. Santos ta nagtutubod siya na ang misteryosang babae yaon sana sa saindang lugar ta parati kaining sinasabi sa surat ang saiyang sulot na bado sa kada aldao.

Nag agi an mga aldao, nakapangagom si Sonny, nagka iguang duwang aki asin nag istar sinda duman sa Texas, USA. Magayon an buhay kan familya ni Sonny duman sa Texas, ta siya naging sarong Journalist sa America, alagad talagang mina abot sa buhay nin sarong bikolano an magbalik sa dagang tinubuan. Si Sonny nagka iguang pang duwang familya sa bikol asin maogmang nagbalik sa saiyang pagiging peryodista sa Naga sagkod na nagretiro ta inabot na niya ang maogmang buhay kan Senior Citizen. Nag istar siya sa sarong simpleng harong sa mahiwas na omahan kan Barangay Sto Tomas duman sa Magarao. Ang Sto. Tomas sarong omahan na lugar kan Magarao, mafresko, asin maboboot an mga tawo, Sagana sa mga sira asin paroy asin malinig an hoyop kan doros. Dara kan maluyang paghiling, kaya mas inuubos ni Sonny an bakante niyang oras, sa pag dungaw sa bintana asin pagmasdan ang mahiwas asin matimgas na kaomahan kan Santa Rosa. Alagad, sa oras nin katuninungan, sa awit kan mga gamgam, dai malikayan ni Sonny an balikan an maogmang agi agi kan mga surat ni Sweet Lovely Rose, ang babaing saiyang namo’tan alagad nungka niyang nahiling sa persona.

50ng taon na an nakaagi, mayo na siyang bareta ki Sweet Lovely Rose ta dai man kaya ini nagtatao saiya nin “return address” kutana naisihan man lamang ni Sweet Lovely Rose na namomootan naman siya ni Sonny, kung kutana saro sinda sa ikinasal sa simbahan ni Monsignor Belleza. Minsan iniisip ni Sonny, na paminsan minsan liwat siyang maglakaw lakaw bitbit an saiyang sugkod, sa kalye kan P. Santos en caso yaon pa diyan si Sweet Lovely Rose, ini magpahiling man lamang ta maski siya saro naman na Lola asin maski pa siya kurubakob na dahil sa rayuma, ini saiyang dudulokon para hinghingan kan tataramon na “ crush taka man Kaidto” An mamundo sa pagmati ni Sonny, iyo na haloyon nang dai nin surat hale saiya, kung en caso man pinapangadye ni Sonny na yaon siya sa kinaban nin katuninungan. Solamente sa katuninungan sa tahaw kan kaomahan kan Santa Rosa, iyo ini an namumutawi sa nguso ni Sonny…”Nasaan Ka Irog Ko”