Nat'l IDs kan PSA nagkukupas andam ribayan kan ahencia

An opisina provincial kan Philippine Statistic Authority (PSA) sa Camarines Sur nagpahayag na igua nang mga reclamo sa mga national ID Cards na nagkukupas na mala ngani igua dai na mabidbid an retrato sagcod na dai na pwedeng magamit.

Alagad sinabi ni PSA Provincial Manager Raul Aspe na bukas an saindang opisina nganing recibihon asin ribayan nin bago.

Sinabi ni Aspe siisay man na may pugol kan ‘‘damaged IDs’’ kinakaipuhan darahon sana sa saindang opisina provincial nganing mag-‘‘fill out a request form for replacement’’. An kupas nang IDs riribayan nin temporary paper ID.

Piglinaw kan PSA Camarines Sur na bako man gabos na IDs envez igua sanang batch na nagkaproblema sa pag-imprenta sa Manila.

Sa kaparejong entrevista ki Aspe sa paagi nin telepono sinabi kaini, nagpapadagos an saindang opisina sa pagrecibe kan mga aplicante para sa national IDs asin sa ngunian igua nang maabot sa 1.7-M an nasa listahan ninda sa target na labing 2-M.

Mientras tanto, sa sinambit na numero igua nang 30K rehistradong senior citizens sa laog kan provincia nin Camarines Sur.

An pagkua nin national IDs kan sinambit na sektor kasunod sa mandato kan Department of Social Welfare and Development (DSWD) na rekisitos na sa mga nagrerecibe nin social pension.