Nata baya ta si Nathan (dapat pang kaibanan)?

Bako man talagang isyu an sarong nagkakandidato sa Naga na sarong Naguenyo. Tandaan ta na an Naga an orihinal na pangaran “Ciudad de Nueva Caceres” hango sa orihinal na “Ciudad de Caceres” duman sa Espanya.

Pero an diocesis kan Caceres lakop bako lang sa enterong Kabikolan kundi abot duman sa Samar asin sa parteng Tayabas ni Quezon asin Angara. Arog kayan kahiwas an nasasakupan kan simbahan kan Caceres kan panahon kan mga Kastila.

Sa totoo lang susog sa estorya asin ki Danny Gerona, an Ciudad de Caceres na pig-iirokan kan mga prayle, opisyales kan gobyerno Espanyol asin kan saindang mga pamilya iyo sana ining parte kan centro kan ciudad na natutugdukan kan supermarket, an kalye Padian o Caceres Street na ngonyan, an Dinaga saka an natutugdukan San Francisco Church, kan Cathedral asin kan palasyo ni Arzobispo.

Sa balyong salog na kinamumugtakan kan Tabuco ngonyan sagkod Tinago asin Dayangdang iyo an Naga kaidto.

An primerong alkalde kan Naga paka-giyera iyo si Leon Sa. Aureus, taga-Libmanan. Saro siyang lider kan mga guirilya kontra sa Hapon.

An congressman ngani kadto na nagpasar kan City Charter kan Naga iyo si Juan Q. Miranda taga-Libmanan man.

An Libmanan iyo an pinakadakula sa mga banwaan kan Camarines Sur (75ng barangay) sakop kan primer distrito kadto na minapoon sa Del Gallego sagkod sa Naga. An ikaduwang distrito poon man sa Pili sagkod nang Partido asin Rinconada.

Kaya bakong isyu kun si Lut del Castillo taga-Bula, si John Bongat taga Partido asin si Legacion Buhi Laker, an ama taga-Buhi, an ina taga-Ombao Polpog, Bula.

Lalo na bakong isyu na si David Casper Nathan Arroyo Sergio propiong taga-Buhi, an uniko o pinaka-unique na banwaan kan Bikol---- sa gamit na tataramon, an danaw kaini iyo an estada kan pinaka-saradit na nakakakan na sira sa bilog na kinaban an sinarapan o pig-aapod na tabios sa luwas kan Buhi, sakop kan Rinconada district pero an lenguahe suhay man sa Iriga o sa Baao o arin man na banwaan kan ika-limang distrito kan Camarines Sur, dakul an matitibay na parasurat, mga artists arog kan pintor asin eskultor, mga propesyonal asin mga honor graduates bako lang sa Naga kundi sagkod sa Manila asin abroad, mala ta naka-producir pa nin bar topnotcher, No. 1 sa persona ni Atty. Gregorio Castillo.

Sa parte ni ex-konsehal Nathan Sergio naguin siyang Naga City Youth Mayor kan 1988, kan magtopnotcher siya sa eksamen na itinao kan City Hall, panahon na kadto ni Jess Robredo kaya siya naguin Youth Mayor asin kinua tulos na maguin halangkaw na opisyal kan ciudad.

An dai aram kan kadaklan iyo na pinaka-enot na Naga City Youth Mayor an saiyang amaon na si depuntong Atty. Romulo Quirino “Butch” Fabul na nabotohan kan mga student leaders kan Naga bilang Youth Mayor kan 1970 antes kan Martial Law. An Vice-Mayor niya si Miss Alice San Andres kan ciudad nin Naga, an mga konsehales si depuntong Atty. Alex Abad, Ambasador Shulan Primavera, Atty. Edgardo Gerobin, Atty. Cynthia Peṅalosa, Ernesto Verdadero asin iba pa.

Kaya an Naga iyo an melting pot kan Bikol, an puso kan Bikol ta dating regional center asin sagkod ngonyan iyo an centro kan Simbahan Katoliko, centro kan komersyo asin pinaka-dakulang ciudad kan ronang Kabikolan.

Arog ki VP Leni Robredo si Nathan Independiente, dai siya kalinyada kan tolong kandidato para mayor kan Naga. Pero garo pigsusuportaran nin pondo ni Sir Noel de Luna na kandidatong congressman. Garo kaya kulang an pondo kaya pigtatabangan man kan milyonaryong kontrtista na para congressman an piglalabanan.

27 anyos na sa servicio publiko si Nathan Sergio.

Konsehal kan Naga (2007-2016), secretary to the mayor(1989-2007), Chief, Urban Poor Affairs (1989-1999).

Kadakul nang awards o pagmidbid arog kan Dangal ng Bayan Award, Model Public Servant of the Year 1997, Outstanding Councilor of the Philippines 2010 asin Apolinario Mabini Awardee 2011.

Pambihira an arog ki Nathan ta maski PWD na sabi ngani medyo taguilid maglakaw pero tanos magdalagan sa politika ta sarong Sergiosong Servidor, gulpi pa siyang plano para sa Naga kun siya ma-elehir kabali na an pagtunaw kan pagtios, pagtao nin kompletong suporta sa mga medical frontliners, magka-igwa nin bastanteng suplay nin dugo sa mga nangangaipo kun may emerhensiya, suportahan an edukasyon kan mga kaakian, tawan laptop o I-pod o smart phone an mga eskwela, libreng wi-fi sa harani sa mga eskwelahan asin mga barangay halls asin pababaon an mga buwis sa negosyo asin daga sa Naga, mag-guibo nin mga de kalidad na ordinansa na matao nin beneficio sa mga kasaraditan asin maski ngani Independiente magtabang sa ibang magaranang opisyales kan ciudad para sa karahayan kan kagabsan, mayong iriwal, matuninong asin marhay an relasyones kan lambang saro.

Kun ako hahapoton magayon an opisyales na maski may kadinan pero desididong magtabang sa banwaan. An mga ehemplo asin modelo iyo sa Apolinario Mabini, an primer ministro kan panahon ni Heneral Emilio Aguinaldo, si depuntong Presidente Franklin Delano Roosevelt (FDR) kan Amerika, an pinak-halawig na Presidente kan Estados Unidos, maguin peace time o may giyera pero nakatukaw sana sa wheelchair ta arog ki Mabini biktima man nin polio, asin an primerong CPA-lawyer na konsehal kan Naga na si depuntong Reynaldo Borja, ama ni Dr. Vito Borja, City Health Officer, asin Paralympic World Champion (basketball on wheelchair).

May mga kadinan pero palaban.

Arog kaiyan si Nathan.

Kaya dapat sa nagdadangadang na eleksyon maka-iba man siya sa linyada kan magarana (maski #1 sana) asin maturukaw sa konseho kan ciudad.