top of page

‘National peace talks’ hinuhorot buhayon

An mga progresibong grupo sa Bicol magkasuhay na nag-marcha sa mga mayor na kalye sa ciudades nin Naga asin Legazpi kan Febrero 8, 2023 nganing huroton sa gobierno na ibuelta an national peace talks.


Antes kan protest rally nagkaigwa ngona nin banal na misa na pig-opresir para sa dipuntong lider kan Communist Party of the Philippines (CPP), Jose Maria Sison na kumpleanyo kan Febrero 8 asin nagpasiring an mga raliyista sa Penaranda Park sa Ciudad nin Legazpi asin sa Plaza Quince Martires sa Ciudad nin Naga.


An rally pinangenotan kan Bagong Alyansang Makabayan (BAYAN), Kilusang Mambubukid sa Bicol (KMB) asin mga miembros asin lider kan iba pang progresibong grupo sa Bicol.


Saindang kurahaw sa administrasyon ni Presidente Ferdinand Marcos Jr. na buhayon giraray an nagkapera nang veces na nagpalyar na urulay pang katuninongan.


Kan panahon ni dating Presidente Rodrigo Duterte nagprubar na buhayon an peace talks alagad liwat nagpalyar. Kasunod kaini, liwat sinda nagmarcha sa mga kalye nganing huroton sa gobierno na buhayon an urulay pang katuninongan.


Sagcod sa ngunian dai pang malinaw na kasimbagan an Malacañang kun igwang bagong estratihiya nganing ibuelta an peace talk.


Sa kaparejong protest rally yaon an grupo kan KMB na saindang hinuhurot na ibasura na an Rice Tariffication Law o Acta Republica 11203.


Si dating Presidente Duterte iyo an nag-aprubar kan RA 11203 padagos na pigrereclamo kan mga paraoma huli ta iyo an nagpasakit sa sainda na nagpabaksak kan presyo kan paroy alagad marahalon an mga gamit sa pag-oma siring kan abuno, banhi, produkto nin petrolyo, mga kemikal kontra sa insekto, patrabajo asin iba pa. Alagad mahal an presyo kan bagas.


Kabali sa saindang pigbiklad na dapat pundohon na kan administrasyon Marcos an pag-angkat nin produkto gulayon asin sibulyas an resulta apektado an pobreng paraoma kan nasyon. (dpa)

Comments


bottom of page